09:29 20 января 2014 г.
Йăлана кĕнĕ тăрăх, Кăшарнире шыва кĕме хатĕрленĕ вырăнсенче яланах çын нумай пухăнать. Çавна май кун пек чухне инкек-синкек тухма та пултарать. Тепĕр чухне шыв-шур хĕрне ÿсĕрле килекенсем, хăйсене япăх тытакансем те пур. Хăшĕ-пĕрисем тата ачасене те вăйпах чăмтарса кăларма хăтланаççĕ. Кăшарнире шыв-шур объекчĕсенче çынсен хăрушсăрлăхне тивĕçтерессипе район администрацийĕн пуçлăхĕ Леонид Николаев ятарлă йышăну кăларнă. Унпа килĕшÿллĕн йĕркелÿ комитетне çирĕплетнĕ, уява пăтăрмахсемсĕр ирттерсе ярассишĕн яваплисене палăртнă.
Юн кун район администрацийĕнче иртнĕ канашлура та ку ыйту тĕп вырăнта пулчĕ. Сăмах ваксем патне пыракан çулсене тасатасси, çутă çитересси, хывăнмалли-тăхăнмалли вырăнсем тăвасси, пăрлă шывра чăмса тухнă хыççăн вĕри чейпе ăшăнма май тăвасси тата ытти пирки пычĕ. Паллах, йĕркелÿ ĕçĕсенчен чи пĕлтерĕшли – хăрушсăрлăха тивĕçтересси.
Çынсем çурçĕр тĕлнелле пухăннине кура çак вырăнсенче ирчченех полици сотрудникĕсем, медицина ĕçченĕсем дежурствăна тухĕç, çавăн пекех ачасемпе çамрăксен спорт шкулĕн спортсменĕсем те йĕркелĕхе тивĕçтерме хутшăнĕç.
Вăрнарти чиркÿ настоятелĕ Александр атте те Кăшарнире вĕçкĕнленсе-паттăрланса сивĕ шывра чÿхенесси мар, чунпа тасаласси пĕлтерĕшлĕ терĕ.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии