09:19 15 января 2014 г.
Район администрацийĕн загс пайĕ иртнĕ çулта ĕç-хĕле РФ Çемье кодексĕпе тата «Гражданла тăрăм акчĕсем çинчен» федераллă саккунпа килĕшÿллĕн йĕркелесе пынă. Мĕнпур заявленисене вăхăтра тата пахалăхлă пăхса тухнă. Тĕрлĕ ыйтупа актсене регистрациленисĕр пуçне загс пайĕн ĕçченĕсем районта çуралнă 100-мĕш, 200-мĕш, 300-мĕш, 400-мĕш ачасене, 50 çул ытла пĕрле шăкăл-шăкăл пурăнакан çемьесене чысласа уявсем ирттернĕ, Çемьепе юрату тата шанчăк кунĕнче «Юратупа шанчăкшăн» медале тивĕçнисене пухса саламланă, патшалăх тата республика шайĕнчи амăшĕн капиталĕсене илекенсене сертификатсене савăнăçлă лару-тăрура панă тата ытти те.
Иртнĕ çула пĕтĕмлетнĕ май пай пуçлăхĕ Алевтина Марковна Степанова тĕп кăтартусемпе паллаштарчĕ:
– Загс пайĕн чи пĕрремĕшле тивĕçĕ – пурнăçĕсене пĕр-пĕринпе çыхăнтарма шутланă мăшăрсене регистрацилесси. Пĕлтĕр районта акă 198 çĕнĕ çемье çуралнă. Çав шутра Таджикистан Республикин гражданĕпе мăшăрланнă тĕслĕх те пулнă. Шутлама панă вăхăтра хăйсен шухăшне улăштаракансем те тупăнаççĕ – пĕлтĕр 10 мăшăр регистрацие килмен.
Тепĕр анлă сарăлнă тивĕçтерÿ – тин çеç çут тĕнчене килнĕ пепкесене ят парса регистрацилесси. Иртсе кайнă çулталăкра 431 ача кун çути курнă, пĕтĕм йышран 149-шĕ поселокра çуралнă. 119 ачан – пĕччен, çемьесĕр амăшĕсем. Икĕ хĕр амăшĕсем пулса тăнă вăхăта вун саккăр та тултарман.
Танлаштарма: пĕлтĕр виçĕмçулхинчен 73 ача ытларах çуралнă. Ултă çемьене иккĕллĕ телей – йĕкĕрешсем – килнĕ.
2012 çулхипе танлаштарсан пĕлтĕр çынсем вилнĕ тĕслĕсем те 49 сахалрах пулнă. 590 çын вилнине регистрациленĕ: 290 арçынпа 300 хĕрарăм. Вăтам çул ÿсĕмĕ арçынсен – 62 çул, хĕрарăмсен – 75 çул. Шел те, çулталăка та çитмен тăватă пепкен пурнăçĕ татăлнă.
– Тивĕçтерÿсен ытти тĕсĕсене кÿресси мĕнле пурнăçланса пынă;
– Гражданла тăрăм акчĕсене улшăнусемпе тÿрлетÿсем кĕртме ыйтса çырнă 199 заявление пăхса тухнă. Вĕсенчен 106-шне, саккунпа килĕшÿллĕн, туллин пурнăçланă. Ачана усрава илессипе çыхăннă пĕр тĕслĕхе регистраци тунă. Кунсăр пуçне граждансем ыйтнипе районти загс пайĕ Украинăра, Казахстанра, Узбекистанра, Туркменистанра тата Эстонире регистрациленĕ гражданла тăрăм акчĕсене ĕнентерекен документсене ыйтса çырса янă. Çакнашкал 4 ыйту районти загс пайне Казахстан республикинчен килнĕ.
Пĕтĕмĕшле илсен, 12 уйăхра пай ĕçченĕсем граждансемпе организацисен 4256 заявленине пăхса тухса тишкернĕ.
Гражданла тăрăм акчĕсене электронлă архива куçарассипе те хастар ĕçлетпĕр. Паянхи куна базăра 1951 çул таран документсем упранаççĕ. Иртнĕ çул 1971 – 1951 çулсенчи 58008 акта электронлă архива кĕртнĕ.
Загс пайĕн тивĕçтерĕвĕсем çинчен граждансем телефонпа та, электронлă почтăпа та, е вырăна килсе ыйтса пĕлме пултараççĕ. Пĕлтĕр пирĕн специалистсем район çыннисене тĕрлĕрен ыйтупа 7500 консультаци панă.
И.ЯКОВЛЕВА
çырса илнĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии