08:44 13 января 2014 г.
Йăлана кĕнĕ тăрăх, Чăваш халăх писателĕ Анатолий Викторович Емельянов çуралнă кун, январĕн 10-мĕшĕнче, «Çĕнтерÿ çулĕ» хаçат редакцийĕн коллегийĕ унăн ячĕллĕ премин тăххăрмĕш лауреатне палăртрĕ.
Кăçалхи лауреат – хамăр районти Хăмăш ялĕнче çуралса ÿснĕ Валерий Павлович Кошкин полковник, пултаруллă сăвăç-çыравçă, куçаруçă, журналист, Раççей журналистсен Союзĕн членĕ. Вулакансем ăна лайăх пĕлеççĕ: сăввисемпе калавĕсем, хамăр тăрăх историне çутатакан статйисем пĕлтĕр район хаçатĕнче уйрăмах чылай пичетленчĕç.
Нумаях пулмасть-ха Чăваш кĕнеке издательствинче Валерий Кошкинăн «Синкер çулсенче: репрессиленĕ чăваш писателĕсем, журналисчĕсем тата ученăйĕсем» çĕнĕ кĕнеки кун çути курчĕ. Çавăн пекех вăл «Чекисты Чувашии» (А.Николаевпа пĕрле), «Для нас война продолжалась», «80 лет управлению ФСБ РФ по Чувашской Республике» (П.Сымкинпа пĕрле) кĕнекенсен авторĕ тата пухаканĕ. Публицистикăпа литература анинче Валерий Кошкин çирĕп утăмсемпе утăмлать, республикăри хаçат-журналта та хастар пичетленет.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии