09:11 30 декабря 2013 г.
Республикăра кăçал пулса иртнĕ чи пĕлте-рĕшлĕ мероприятисен рейтингне пĕтĕмлетнĕ. Унпа килĕшÿллĕн, хисеплĕ пĕрремĕш вырăнта – Республика кунĕ тата ку уявпа çыхăннă мероприятисем.
Июнĕн 21–22-мĕшĕсенче акă Шупашкарти VI экономика форумне Раççейĕн 27 субъектĕнчен 1000 ытла çын хутшăннă. Беларусь, Великобритани, Израиль, Инди, Тунис, Украина, Чехи, Словени çĕршывĕсен гражданĕсем республика хăнисем пулнă. Раççей экономика аталанăвĕн, вĕрентÿ, ял хуçалăх министерствисен, тĕнчипе паллă организацисен, инвестици компанийĕсен, ют çĕршыв компанийĕсен представителĕсем, Патшалăх Думин депутачĕсем, банкирсемпе ученăйсем тата ыттисем хутшăннă форум ĕçне.
«Регионсем – чикĕсĕр ĕçтешлĕх» регионсем хушшинчи ХХ курав та Шупашкарта Раççей 13 субъектĕнчен тата Италирен 228 организацие пухнă. Форумăн тĕп йышăнăвĕ – Шупашкарта технологипе инновацие пулăшу памалли Центр уçасси. Республика çыннисене Шупашкарти, Мускаври, Санкт-Петербургри, Беларусьри, Украинăри ушкăнсем фейерверксен фестивалĕнче те пысăк савăнăç парнеленĕ.
Фестиваль гран-прине Дзержинск хулинчен килнĕ «Кальвин» обществăн команди тивĕçнĕ.
Пĕтĕм Раççейри «Раççей çăл куçĕсем» фестиваль 21-мĕш хут иртнĕ, вăл çĕршывăн тĕрлĕ кĕтесĕсенчен килсе çитнĕ 30 ытла коллектива пĕрлехи сцена çине пухнă. Çавăн пекех июнĕн 24–25-мĕшĕсенче «Уй кунĕ – 2013» курав-демонстрацие хамăр çĕршывра ял хуçалăх техникипе, паха вăрлăхпа, им-çампа тата ыттипе тивĕçтерессипе ят-сум çĕнсе илнĕ организацисем хутшăннă, перекетлĕ те тухăçлă ĕçлекен техникăпа паллаштарнă.
Республика кунĕ йĕркипе иртнĕ сумлă мероприятисен йышĕнче – Красноармейски салинче «Траковская керамика» завода хута яни, Етĕрнере сĕт продукцийĕ кăларакан завода уçни, республикăри тата ун тулашĕнчи чăвашсене пĕрлештернĕ Акатуй.
Рейтингра иккĕмĕш вырăнта палăртнă мероприяти – çăлтăрпа зарядкăна тухни. Чи нумай (28 пин) çын хутшăннипе иртнĕ зарядка Гиннес рекордне лекнĕ.
Виççĕмĕш вырăнта спортпа çыхăннă событи – республика физкультурăпа спорт аталанăвĕ енĕпе «Раççей регионĕ» номинацире наци премине тивĕçнĕ. Çĕнтерÿ кубокĕпе савăнăçлă лару-тăрура ЧР Пуçлăхне Михаил Игнатьева РФ Спорт министрĕ Виталий Мутко чысланă.
Чăваш ен – çар учетне йĕркелессипе те Раççейре чи лайăх регион. Çавна май Михаил Игнатьев республикăна Раççей Оборона министрĕн вымпелне панă церемоние хутшăннă.
Пиллĕкмĕш вырăнта – Чăваш ен команди Сочире спорт туризмĕ енĕпе Пĕтĕм Раççейри çамрăксен фестивалĕнче çĕнтерни.
Октябрĕн 26-мĕшĕнче иртнĕ Чăваш наци конгресĕн съезчĕ те общественноç шухăшĕпе республикăшăн пĕлтерĕшлĕ. Унта конгресăн управлени органĕсен çĕнĕ тытăмне суйланă. Хальхи çĕнĕ президенчĕ – ЧР Патшалăх Канашĕн депутачĕ Николай Угаслов.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии