14:37 25 декабря 2013 г.
Раштав уйăхĕн 27-мĕшĕнче Олимп вăййисен тĕп символĕ Чăваш ене пысăк уявпа савăнтарĕ. Çулăма йăтакан 163 çыншăн вăл уйрăмах хумхануллă самант. Мĕн шухăшлаççĕ-ха çакăн пирки вĕсем;
Çулăма пĕрремĕш йăтма Олимп чемпионкине, СССР спортăн тава тивĕçлĕ мастерне Елена Николаевăна шаннă. «Олимп çулăмĕн эстафети Чăваш енре пурăнакан мĕнпур çынна унпа çыхăнтарĕ. Эпĕ республикăри пĕлтерĕшлĕ пулăма хутшăнма тивĕçнĕшĕн савăнатăп, çав вăхăтрах старта тухнă евĕр пăлханатăп»,– тенĕ спортсменка.
ЧР Физкультурăпа спорт тата туризм министрĕ Сергей Мельников та эстафетăна савăк кăмăл-туйăмпа кĕтсе илет: «Çĕнĕ çул çывхарнă май парне пекех пулĕ вăл чăваш халăхĕшĕн, республикăн кун-çулне ĕмĕрлĕхе çырăнса юлĕ», – тенĕ Сергей Владимирович.
РФ Шалти ĕçсен министерствин Сĕнтĕрвăрринчи пайĕнче ĕçлекен полици капитанĕ Светлана Ерпылева, ишес енĕпе ăсталăха туптаканскер, Чăваш ен чемпионатĕнче 10 хут çĕнтерÿçĕ пулнă, кăçал çĕршыври чи вăйлă триатлонçăсен ăмăртăвĕнче бронза медаль çĕнсе илнĕ. «Хĕллехи Олимп вăййисен программине сивĕ шывра ишес енĕпе ăмăртусем кĕртмен пулин те пире Сочире хамăр пултарулăха кăтартма чĕнчĕç, çавăнпа та унта çитсе килетпĕрех», – пĕлтернĕ Светлана Юрьевна.
РФ Спортăн тава тивĕçлĕ мастерĕ, ХХХ Олимп вăййисен бронза призерĕ Татьяна Архипова та: «Маншăн уйрăмах иртнĕ çул ăнăçлă пулчĕ, тĕнчери чи сумлă ăмăртура медаль çĕнсе илтĕм. 2013 çул вара телей пернелерĕ – çемьере йыш хушăнчĕ. Акă Олимп вăййисен çак эстафетине хутшăнма чĕнчĕç те чунтан савăнтăм», – тет.
Олимп çулăмне йăтакансен йышĕнчи тепĕр пултаруллă çын – паллă балетмейстер, «Суварята» ача-пăча ансамблĕн ертÿçи Ирина Музыкантова. Ăна та хăйĕн шухăшĕпе вулакансене паллаштарма ыйтрăмăр: «Пурнăçăмри тата ĕçĕмри тĕллевсем Олимп вăййисемпе çыхăннă: пур енĕпе те лайăххи патне ăнтăлни, пĕр-пĕрне хисеплени тата туслăх. Олимп çулăмне йăтни çамрăк ăрăва çĕнĕ ÿсĕмсем патне ăнтăлма хавхалантарасса шанатăп».
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии