14:25 25 декабря 2013 г.
РФ Правительствин 2012 çулхи февралĕн 28-мĕшĕнчи 166-мĕш номерлĕ постановленийĕпе тата ЧР Министрсен Кабинечĕн 2011 çулхи сентябрĕн 21-мĕшĕнчи 399-мĕш постановленийĕпе килĕшÿллĕн ЧР Министрсен Кабинечĕ хресчен хуçалăхĕ (фермер) ĕçне пуçаракансене грант шучĕпе патшалăхран пулăшас тĕллевлĕ Йĕрке туса çирĕплетнĕ. Пулас фермерсене республика бюджечĕпе федеральнăй бюджетран укçа уйăрса пулăшаççĕ. Программа участникне конкурс комиссийĕ палăртать. Заявитель – Раççей Федерацийĕн 19–58 çулхи гражданинĕ. Пулас фермертан конкурса пĕр заявка кăна йышăнаççĕ. Программăпа палăртнă условисене туллин пурнăçламалла, документсене тĕплĕ, тимлĕ хатĕрлемелле. Республика тулашĕнче пурнакансенчен, панкрута тухакансенчен документсем йышăнмаççĕ.
Хресчен (фермер) хуçалăхĕ йĕркелес кăмăллисен Министрсен Кабинечĕ çирĕплетнĕ Йĕрке положенийĕпе, суйлав конкурсĕн йĕркипе, Программа участникĕсене республика бюджетĕнчен пулăшас йĕркепе, заявкăпа пĕрле тăратмалли документсен списокĕпе район администрацийĕн ял хуçалăх пайĕнче ятарласа паллашмалла, заявка бланкне те çавăнтах илмелле.
Фермер ĕçне кÿлĕннисем 2012 çулта тăваттăн пулчĕç. Вĕсем: Игорь Николаевич Сергеев – Кĕçĕн Кипек ял тăрăхĕ, Светлана Николаевна Лукина – Пăртас ял тăрăхĕ, Алексей Николаевич Фадеев – Ершепуç ял тăрăхĕ, Иван Михайлович Федоров – Вăрнар. Кăçал çак фермерсем пулăшу илнĕ: Людмила Дмитриевна Дмитриева – Мăн Турхан ял тăрăхĕ, Алексей Николаевич Лукин – Малти Ишек ял тăрăхĕ, Денис Германович Харитонов – Вăрманкас ял тăрăхĕ, Виталий Георгиевич Яковлев – Уйкас Кипек ял тăрăхĕ.
Фермер-хресчен хуçалăхĕсем йĕркелесшĕннисем валли çăмăллăхсем чылай пăхнă. Кам ĕçе тытăннă – чиперех аталанса пырать. Пуçаруçăсем опыт пухнисенчен вĕренсе пыма пултараççĕ. Пуçра шухăш, план çуралнисен иккĕленсе, тытăнса тăма кирлĕ мар, малтан, тепĕр хут калатăп, пирĕн пата çитсе калаçма юрать.
Е.АЛЕКСЕЕВ,
Агроинновацин Вăрнарти консультаци центрĕн директорĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии