14:20 25 декабря 2013 г.
Район администрацийĕн пуçлăхĕн Леонид Николаевăн пÿлĕмĕнче тунтикунсерен иртекен черетлĕ планерка ку хутĕнче минутлăх шăплăхран пуçланнă. Пухăннисем депутатсен районти Пухăвĕн депутатне, Чăваш Республикин тава тивĕçлĕ вăрман ĕçченне, декабрĕн 22-мĕшĕнче пурнăçран вăхăтсăр уйрăлнă Николай Никандрович Анисимова асăнса шăп тăнă. Николай Никандрович пĕтĕм пурнăçне вăрман ĕçне халалланă. Районта ăна хăй ĕçне пĕлекен, хастар та таса чунлă ертÿçĕ пулнипе аван пĕлеççĕ.
Тĕп ыйтупа хальхинче Çĕнĕ çул уявĕн мероприятийĕсенче хăрушсăрлăха тивĕçтерессине пăхса тухнă. Районта вĕсем паянтан тытăнаççĕ. Кашни вĕренÿ тата культура учрежденийĕнчех елкăсем иртеççĕ. Вĕрентÿпе çамрăксен политикин пайĕн пуçлăхĕ Николай Иванов вĕсем ытларахăшĕнче кăнтăрла иртессине пĕлтернĕ. Пур шкулта та эвакуаци вĕренĕвĕсене ирттернĕ, пурне те сертификацилле гирляндăсемпе усă курма сĕннĕ, пÿлĕмсенче уçă çулăмпа, пиротехникăпа усă курма юраманнине çирĕп асăрхаттарнă.
Ял-хула поселенийĕсенче уяв мероприятийĕсем вăхăтĕнче яваплă çынсем пулмаллине, шыв çăлкуçĕсене тата пушар гидранчĕсене йĕркере тытмалли çинчен ятарлă программăсен пайĕн пуçлăхĕ Федор Тимофеев аса илтернĕ.
Социаллă хÿтлĕх пайĕн ертÿçи Ирина Смолина сахал тупăш илекен çемьесенчи ачасем валли 1236 пылак парне хатĕрленине, кунашкал тата йышлă çемьесенче çитĕнекен 26 ачана Шупашкара елкăна илсе каяссине пĕлтернĕ.
Кунсăр пуçне районта шкул хастарĕсем, тăлăх тата инвалид ачасем валли çавăн пекех В.Свешников депутат елкисем иртеççĕ.
Леонид Николаев поселокри «Березка» тата «Рябинка» ача сачĕсенче ыйтусем пуррине, температура режимĕ тивĕçтерменнипе Роспотребнадзор суд йышăнăвĕччен вĕсене ĕçлеме чарнипе ыйтусем сиксе тухнине палăртнă. 4-мĕш ача садĕнче ĕçсене вĕçленĕ, 5-мĕшĕнче ку енĕпе тимлеççĕ.
Планеркăра çавăн пекех усă курман çĕр лаптăкĕсене йĕркелесси пирки çĕр хутшăнăвĕсен секторĕн заведующийĕ Екатерина Федотова, налуксем пирки 3-мĕш инспекци пуçлăхĕ Юрий Егоров сăмах илнĕ.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии