10:17 18 декабря 2013 г.
Ытлари кун 100,3 FM хумсем çинче «Тăван Радио» сăнав шайĕнче эфира тухнă. Аса илтеретпĕр, ăна Чăваш наци радионе ытларах сарас тĕллевпе туса хунă. Унччен наци радиовĕ 105,0 FM тата 72.41 УКВ хумсем çинче кăна тухнăран сигналсене районсенче кăна йышăннă. Халĕ вара наци радиовĕн тата «Тăван радион» чи лайăх программисене пĕтĕм республикипех итлеме май пулĕ.
Наци телерадиокомпанийĕн директорĕн тивĕçĕсене пурнăçлакан Юлия Стройкован сăмахĕсем тăрăх, «Тăван радио» талăкĕпех ĕçлеме тытăнмалла. Эфирта – чăвашла тата вырăсла хыпарсем, обществăпа политика, вĕрентÿллĕ программăсем, вăйă-юрăсем. Ирхи кăларăма «Тăван микс ир» программа уçать, эфира «Тăван микс каç» вĕçлет. Çивĕч ыйтусемпе интервьюсем, студи хăнисем – 13–16 сехетсенче. Çавăн пекех эфирта радиоспектакльсем, классика тата хальхи вăхăтри кĕвĕ-юрăсем пулĕç.
«Тăван радио» хăйĕн ĕçне декабрĕн 17-мĕшĕнче, Чăваш ен Пуçлăхĕ Михаил Игнатьев Патшалăх Канашне Çырупа тухнă кун, пуçлани те – хăйне евĕрлĕ паллă пулăм.
Хамăр инф.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии