09:27 18 декабря 2013 г.
Район администрацийĕн пуçлăхĕ Леонид Николаев ирттернĕ планерка яланхи пекех унчченхи эрне пĕтĕмлетĕвĕсенчен пуçланчĕ. Депутатсен районти Пухăвĕн ларăвĕнче район бюджетне çирĕплетнĕ, район делегацийĕ РФ Конституцин 20 çулхи юбилейне халалласа оперăпа балет театрĕнче йĕркеленĕ уява хутшăннă, граждансене йышăнмалли пĕрлĕхлĕ кун 100 енне ыйтăва хуравланă, Раççей Президенчĕ В.Путин парламента Çырупа тухни – çак тата ытти событисемпе палăрса юлнă иртнĕ эрне.
Тунти кунхи планеркăн тĕп теми пушар хăрушсăрлăхĕ пулчĕ. Декабрьте çулăмра умлă-хыçлă пушарсенче икĕ çын вилнине кура ку ыйту уйрăмах çивĕч тухса тăнă. Леонид Николаев инкексене асăрхаттарассипе профилактика ĕçне вăйлатмаллине каларĕ.
Район администрацийĕн пуçлăхĕн заместителĕ – ятарлă программăсен пайĕн пуçлăхĕ Федор Тимофеев ăнлантарнă тăрăх, пушар хăрушсăрлăхĕ гражданла оборона тата чрезвычайлă лару-тăрусен ĕçĕсемпе тимлекен район комиссийĕн кашни ларăвĕнчех тĕп ыйтура. «2012 – 2014 çулсенче гражданла оборонăна аталантарасси, хăрушсăрлăха чакарасси, çутçанталăк тата техногенлă чрезвычайлă лару-тăрусене пула тухакан инкексене çăмăллатасси» район программи ĕçлет. Ăна пурнăçа кĕртме 8,7 миллион тенкĕ пăхса хăварнă, çав шутра кăçал 3 миллион тенкĕ уйăрнă.
Районта профилактика ĕçĕпе тимлекен 19 ушкăн туса хунă, вĕсен вăйĕпе 32 пĕрлехи рейд ирттернĕ, 1320 кил-хуçалăха тĕрĕсленĕ, çав шутра – ăнăçсăр 144 çемьене тата нумай ачаллă 70 çемьене.
Вут-çулăм айăпĕпе тухакан инкексемпе районта, тĕпрен илсен, Вăрнарти 27-мĕш пушар чаçĕн, Çĕрпелти тата Ярмушкари уйрăм постсен командисем кĕрешеççĕ. Кульцав, Пăртас, Ершепуç тата Кĕçĕн Кипек ял поселенийĕсенче йĕркеленĕ ирĕклĕ пушар командисем талăкĕпех сыхлавра, вĕсем хăйсен тăрăхĕсенчи кăна мар, ытти поселенисенче пурăнакансене те инкекре пулăшма хатĕр. Çавăн пекех калининăсен хăйсен муниципаллă пушар хуралĕ пур. Ирĕклĕ пушар сÿнтерекенсен йышне кĕнисем вара районта пĕтĕмпе 473 çын шутланаççĕ.
Федор Тимофеев хăш-пĕр ялсенче пĕвесем патне шыв илме пымалли çулсем çуккине – хытă сийлĕ çулсем сарманнине – палăртрĕ. Ырă тĕслĕхлисен шутĕнче – Вăрманкас ял поселени администрацийĕн ĕçĕ. Пăртас тăрăхĕнче те пушар хăрушсăрлăхне тивĕçтересси пысăк тимлĕхре.
Тепĕр кăткăс ыйту пур – Калининăри муниципаллă пушар хуралĕ акă поселение кĕмен тĕрлĕ яла инкек вырăнне тухса каять. Кивĕ машинăна юсавлă тытса тăма, çунтармалли-сĕрмелли материалсем çине каякан тăкаксем пĕтĕмпех поселени бюджечĕ çине тиенеççĕ. Вĕсене кăшт та пулин саплаштарма укçа-тенкĕ уйăрас ыйтăва татса пама сĕнчĕ район администрацийĕн пуçлăхĕ. Çĕнĕ çул уявĕсем инкек-синкексĕр иртчĕр тесе мĕн пур мерăсем йышăнмаллине асăрхаттарчĕ. Тĕрлĕ пиротехника, гирляндăсем, вăрăм уявсенче эрех-сăрапа ытлашши аташни хăрушлăха куçни ан пултăр терĕ.
Малалла калаçу Конституци кунĕнче çынсене йышăнмалли пĕрлĕхлĕ кун пĕтĕмлетĕвĕсем пирки пычĕ. Ку мероприяти пуриншĕн те çĕнĕлĕх пулин те районта усăллă иртнине, халăх ырласа йышăннине палăртрĕ район администрацийĕн йĕркелÿпе кадр ĕçĕн тата юридици службин пайĕн пуçлăхĕ Николай Петров. Унăн сăмахĕсем тăрăх, вырăнти хăй тытăмлăх органĕсене çак кун 100 ыйтупа пĕлтерÿ килнĕ. Район çыннисемшĕн пурăнмалли çурт-йĕрпе коммуналлă хуçалăх ыйтăвĕсем чи кăсăклантараканнисем, пăшăрхантараканнисем пулни курăннă (пĕтĕмпе 20 ыйту). Социаллă (15), çĕр пайĕсене регистрацилес (8), сывлăх сыхлавĕн (5), урамсенчи çутă тĕлĕшпе (8), культура (4) ыйтăвĕсем тата ыттисем те пулнă.
Районти тĕп больницăн тĕп врачĕ Николай Тинюков пĕлтернĕ тăрăх, гриппа тата ОРВИпе аптăракансен шайĕ районта унчченхинчен ÿсмен, шăмат кун çул çинчи аварире çăмăл аманнă çынна илсе килнĕ тĕслĕх пулнă.
Район администрацийĕн пуçлăхĕ Леонид Николаев çак эрнери мероприятисен планĕпе паллаштарчĕ. Чи малтанах – ытлари кун Чăваш ен Пуçлăхĕ Михаил Игнатьев Патшалăх Канашне Çырупа тухни. Юн кун – информаци кунĕ, унта ЧР экономика аталанăвĕн, промышленноçпе суту-илÿ министрĕ Владимир Аврелькин ертсе пыракан ушкăн хутшăнмалла.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии