11:28 16 декабря 2013 г.
Раççейре Тĕп статистика комитетне туса хунăранпа 150 çул çитнĕ май тата статистика çулталăкне халалласа Чăвашстат кăçал ирттернĕ пысăк мероприятисенчен пĕри – «Статистика асамлăхĕсем» викторина. Унта пĕтĕм республикипех 7–8-мĕш классенче вĕренекенсене явăçтарнă.
Ку викторина – ятарлă социаллă проект, шкул ачисене статистика ĕçĕ-хĕлĕпе паллаштарас, вĕсен пĕлÿ шайне ÿстерес, статистика даннăйĕсемпе кăсăклантарса усă курма хăнăхтарас тĕллевлĕ.
Пĕрремĕш тапхăрĕ апрель уйăхĕнчех Шупашкарти шкул ачисем хушшинче иртнĕ, иккĕмĕшĕ – октябрь–декабрь уйăхĕсенче, кашни районти пĕр шкулта.
Хамăр районта викторинăна ирттерме Вăрнарти 2-мĕш шкула суйласа илнĕ. Акци йĕркипе юн кун 7«А» класра пĕлÿ пухакансемпе патшалăх статистика службин районти ĕçченĕсем – Людмила Осипова тĕп специалист-эксперт тата Надежда Александрова 3-мĕш разрядлă специалист – тĕл пулнă.
Шкул программинче статистика предмечĕ çук пулин те, ачасем ку хăйне евĕрлĕ ăслăлăх енĕпе те пысăк пĕлÿ кăтартнă. Статистика службин ĕçченĕсен заданийĕсене вĕсем тĕрĕс те пĕринчен тепри маттуртарах пурнăçланă, ыйтăвĕсене анлă шухăшлав кăтартса хуравланă.
Анчах хăть мĕнле ăмăрту-тупăшура çĕнтерÿçĕ пĕрре. «Статистика асамлăхĕсем» викторинăра Максим Нарышкин мала тухнă. Станислав Зиновьевпа Наталья Макарова та хăйсен пĕлĕвĕпе мухтанма пултараççĕ – вĕсем иккĕмĕш тата виççĕмĕш вырăнсене йышăннă. Çĕнтерÿçĕсем Чăвашстат ятĕнчен дипломсене тивĕçнĕ.
И.Яковлева.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии