11:24 16 декабря 2013 г.
Чăваш ен Пуçлăхĕ Михаил Игнатьев «Созвездие» ача садне уçнă вăхăтра массăллă информаци хатĕрĕсен представителĕсемпе калаçнă
– Калăр-ха, тархасшăн, ача сачĕсем тĕлĕшпе программăсем мĕнле пурнăçланаççĕ;
– Хăвăрах куратăр, ача сачĕсем тăвас тата модернизацилес программăсем ĕçлеççĕ. Çĕнĕ, хальхи вăхăтри садиксем уçатпăр. Кусем совет тапхăрĕнчинчен самай уйрăлса тăраççĕ. Вĕсене музыка, физкультурăпа спорт залĕсемпе, интерактивлă пÿлĕмсемпе, бассейнпа пуянлатнă. Пĕтĕм хăтлăха ачасем пирĕн пуласлăх пулнине палăртса тунă. Вĕсенче Раççей, Чăваш ен пуласлăхĕ. Çак условисенче çĕршывăн тивĕçлĕ гражданинĕ – тĕллевлĕ, ăслă, хăюллă, ырă чунлă çын – пулса ÿсмелле.
– Юлашки вăхăтра çамрăксене патриотла воспитани парасси çине пысăк тимлĕх уйăраççĕ. Сирĕн шухăшпа çак ачасене чăннипех кирлĕ-и; Чăваш енре ку енĕпе мĕнле проектсем пурнăçланаççĕ;
– Паллах, ку – пĕлтерĕшлĕ фактор, мĕншĕн тесен 90-мĕш çулсем хыççăн патриотизм воспитанийĕн йăлисем çухалнă. Пĕлетĕр ĕнтĕ, Раççей Президенчĕ çумĕнчи Атăлçи федераци округĕн полномочнăй представителĕ Михаил Бабич çамрăксен патриотизмĕпе сакăр проект хатĕрленĕ. Малтанхи кăтартусене Çĕнĕ çул умĕн пĕтĕмлетĕпĕр. Ман шутпа, пур проект та тухăçлă ĕçлерĕç. Пирĕн ачасем, шкул ачисем, студентсем ултă проекта хутшăнчĕç. Лайăх результатсем пур.
– Мĕнлерех проектсем-ши вĕсем;
– Ку вăл спорт туризмĕ. Пирĕн ачасем Раççей регионĕсем хушшинче пĕрремĕш пулчĕç. Ку кăтартусемшĕн эпĕ питĕ хĕпĕртетĕп.
Çавăн пекех «Гвардеец», «Доступная среда», «Ачалăха тавăр» тата ытти проектсем. Çакă пĕтĕмпех пĕр – патшалăх енчен ачасем çине тимлĕх уйăрас – тĕллевпе пурнăçланать. Вĕсем личноçе, ăс-тăна аталантарма пулăшаççĕ. Задача ансат мар. Профессионаллă спортсменсене явăçтарни кăна мар, ял поселенийĕсем, микрорайонсем, муниципаллă район, регион, çĕршыв шайĕсемпе çамрăксене хутшăнтарасси.
Пирĕн «Молгород» çамрăксен форумĕ ĕçлет. Кăçал Саратов облаçĕнче иртнĕ «iВолга» форума пирĕн çамрăксем те хутшăнчĕç. Харпăр-хăй шухăшĕсене кăтартма майсем пур. Кусем пĕрреллĕ мероприятисем мар. Вĕсем вăраха тăсăлĕç. Самантпа усă курса участниксене, вĕсен ашшĕ-амăшне тав тăватăп. Паллах, результатсем тĕрлĕрен пулаççĕ, анчах та проекта хутшăнни хăех çĕнтерÿпе танлашать.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии