10:55 16 декабря 2013 г.
Раштав уйăхĕн 27-мĕшĕнче Чăваш ен тĕп хулинче Олимп çулăмĕн эстафети иртĕ.
ЧР Физкультурăпа спорт тата туризм министерствинчен пĕлтернĕ тăрăх – эстафета кăнтăрла 12 сехетре чукун çул вокзалĕнче старт илĕ. Олимп вăййисен тĕп символĕ хула урамĕсемпе (пурĕ 33 çухрăма яхăн) хĕмленсе «Олимпийский» стадионта çуталĕ. Унтах пысăк та савăнăçлă уяв кĕрлĕ. Хĕрлĕ лапам та чаплă концерта йыхравлĕ, сывă пурнăç йĕркине тытса пыракансем Хĕл мучипе зарядкăна тухĕç.
Олимп çулăмне вара 160 çынна йăтма шаннă. Вĕсен йышĕнче республикăри паллă спортсменсемпе тренерсене, общество хастарĕсемпе патшалăх службин ĕçченĕсене, ÿнер ăстисене, вĕрентекенсемпе студентсене курăпăр. Çавăн пекех эстафетăна Универсиада çулăмĕн эстафетинче опыт илнĕ 300 ытла волонтер хутшăнĕ.
Аса илтеретпĕр: Олимп вăййисем Сочире 2014 çулхи нарăсăн 7–23-мĕшĕсенче иртĕç.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии