10:49 11 декабря 2013 г.
Ирĕклĕ майпа кĕрешекенсем декабрĕн 6–8-мĕшĕсенче Çĕнĕ Шупашкарта 1998–1999 çулсенче çуралнă хĕрсем хушшинче иртнĕ Раççей первенствинче вăй виçнĕ. Пирĕн районтан унта Виталий Петрович Трофимов патĕнче ăсталăха туптакан пилĕк хĕр – Тĕмпекри Наташа Дмитриевапа Мăн Турханти Надя Краснова (иккĕшĕ те халĕ Шупашкарти олимп резервин училищинче вĕренеççĕ), Элмен Сунарти Марина Осипова, Тĕмпекри Настя Дмитриева тата Санарпуçĕнчи Регина Краснова – хутшăннă.
37 килограмлă виçе категорийĕнче Наташа Дмитриева виççĕмĕш вырăн йышăннă. Шел те, ыттисем çĕнтерÿ пьедесталĕ çине хăпарайман, анчах та вĕсем пурте лайăх тытăçупа савăнтарнă.
Çакна та каламалла, ку спортсменсем кĕрешÿ вăрттăнлăхĕсене нумаях пулмасть ăса хывма пуçланă, апла пулин те вĕсен шутĕнче пĕр çĕнтерÿ кăна мар. Çакă тренерăн пысăк ăсталăхне кăтартса парать. Виталий Петровичăн мухтанмалли пур – ун шкулĕнчен тĕрлĕ шайри чемпионсем чылай тухнă.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии