09:30 09 декабря 2013 г.
Чăваш ен Пуçлăхĕ Михаил Игнатьев Раççей Правительствин Председателĕ Дмитрий Медведев патшалăх тата муниципаллă тивĕçтерÿсем сĕнекен нумай функциллĕ центрсене аталантарассипе ирттернĕ видеоселекторлă канашлăва хутшăннă.
Раççей премьер-министрĕ ку центрсене туса хуни çынсене документсем илме тĕрлĕ инстанцисене çÿрессинчен хăтăлма май панине каланă.
Раççейре кунашкал центрсем – 848. 2015 çул вĕçнелле çĕршыври çынсен 90 проценчĕ «пĕр чÿрече» мелĕпе тивĕçтерÿсем илме пултарĕ. «Документсене йышăнакан тата паракан пункт кашни хула округĕпе муниципалитетра пулмалла. Ку центрсен çыхăну каналĕ пахалăхлă пулни, хальхи вăхăтри информаци системипе никĕсленни пĕлтерĕшлĕ. Çакна эпир стратегилле задачăсен шутне лартнă»,– палăртнă РФ Правительство Председателĕ.
Раççей экономика аталанăвĕн министрĕ Олег Фомичев хăй сăмахĕнче нумай функциллĕ центрсем туса хурассипе Чăваш ен Мускав, Чулхула тата Калуга облаçĕсемпе, Югра республикипе тан малта пынине пĕлтернĕ.
Çулталăк вĕçленнĕ тĕле республикăра НФЦсен шучĕ 116-а çитмелле. Ун тивĕçтерĕвĕсене 162 пин ытла çын ыйтса çырнă.
Республикăра çавăн пекех патшалăх тата муниципалитет тивĕçтерĕвĕсене илме модельлĕ библиотекăсен никĕсĕ çинче те çакнашкал «чÿречесем» уçас проект пурнăçланать. Хальлĕхе вĕсем 120 библиотекăра ĕçлеççĕ.
Пирĕн районта нумай функциллĕ центр апрельтенпе ĕçлет.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии