09:16 04 декабря 2013 г.
Иртнĕ эрне кун Чăваш ен Пуçлăхĕ Михаил Игнатьев Тĕп çар округĕн штабĕн йĕркелÿпе мобилизаци управленийĕн пуçлăхĕпе Александр Линьков генерал-майорпа тĕл пулнă. Çавăн пекех вăл РФ Хĕç-пăшаллă Вăйĕсен çар управленийĕн органĕсем ирттернĕ çар учетне пурнăçлассине чи лайăх йĕркелемелли смотр-конкурсра çĕнтернĕшĕн Чăваш Республикине Раççей оборона министрĕн вымпелне панипе çыхăннă савăнăçлă уява хутшăннă.
Çакăн евĕр смотр-конкурса Раççей Правительстви 2006 çулта çирĕплетнĕ. Александр Линьков пĕлтернĕ тăрăх, конкурс комиссийĕ апрельте Чăваш енре ĕçленĕ. Тĕрĕслев кăтартăвĕсем тăрăх республика Раççей Федерацийĕн мĕнпур субъекчĕсем хушшинче тивĕçлипе пĕрремĕш вырăн йышăннă.
Михаил Игнатьев республикăра çарпа патриотизм воспитанине пысăк тимлĕх уйăрнине палăртнă. «Сумлă-хисеплĕ çынсем Раççейĕн чăн-чăн гражданĕсене воспитани парассипе ырă тĕслĕх пулса тăраççĕ», – тенĕ республика пуçлăхĕ.
Çар учетне пурнăçлассине йĕркелессине пысăк тÿпе хывнăшăн Чăваш ен Пуçлăхне тата Канаш район администрацийĕн пуçлăхне РФ Оборона министрĕ ячĕпе алла çыхмалли сехетпе чысланă.
Смотр-конкурса республикăри мĕн пур хула тата ял поселенийĕсем хутшăннă.
Хамăр инф.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии