09:08 04 декабря 2013 г.
Район администрацийĕн пуçлăхĕ Леонид Николаев ирттерекен тунти кунхи черетлĕ планеркăра тĕп ыйтупа нумай функциллĕ центрăн ĕç-хĕлне тата хĕллехи вăхăтра вырăнти пĕлтерĕшлĕ çулсене тытса тăрассине пăхса тухнă.
Нумай функциллĕ центр (НФЦ) ертÿçи Ольга Никишова пĕлтернĕ тăрăх, учреждени ĕçлеме пуçланăранпа, кăçалхи апрельтен, кунта 1240 çын ыйтса çырнă. Вĕсенчен 732-шĕ тивĕçтерÿ пама заявленипе тухнă, 508-ăн консультаци илнĕ. Уйрăмах шкул çулĕчченхи вĕрентÿ организацийĕсен тивĕçтерĕвĕсем (256) тата çĕр лаптăкĕсем уйăрас (237) тĕлĕшпе заявленисем чылай.
НФЦ «пĕр чÿрече» мелĕпе ĕçлет. Урăхла каласан, çын пĕрре ыйтса çырсанах ун ыйтăвне хăйсĕрех, патшалăх тата муниципаллă тивĕçтерÿсем паракан органсемпе хутшăнса, тивĕçтереççĕ.
Ку уйăхра çавăн пекех Сывлăх сыхлавĕпе социаллă аталану министерствин тăватă тивĕçтерĕвĕ тĕлĕшпе заявленисем йышăнма пуçлаççĕ. НФЦ хăйĕн ĕçне тÿлевсĕрех пурнăçлать, РФ саккунĕпе килĕшÿллĕн патшалăх пошлинине тÿлеттернисĕр пуçне.
Ольга Никишова центр ирхи 8 сехетрен пуçласа каçхи саккăрччен ĕçлени те çынсемшĕн меллĕ пулнине палăртнă.
Малалла калаçу çулсене тытса тăрасси çине куçнă. Район администрацийĕн строительство тата ЖКХ пайĕн пуçлăхĕн заместителĕ Владимир Иванов районти 128,8 километр çула «Вурнарыдорстрой», 51,6 километр çула «Чувашавтодор» акционерсен уçă обществисем пăхса тăнине каланă. Хĕлле пăрлак çулран сыхланма 5,6 пин тонна хăйăрпа тăвар хутăшĕ кирлĕ. Районта ку запас пур. Иртнĕ эрне кун çул-йĕр ăстисен унпа усă курма тивнĕ. Çулсем çине юр тасатакан техника та тухнă. Хĕллехи вăхăтра 45 техника, вăл шутра 7 грейдер, хăйăр сапакан 10 КамАЗ ĕçлĕç. Хальхи вăхăтра çулсем айĕнчи шыв пăрăхĕсен пуçĕсене хуплассипе тимлеççĕ.
Декабрьте, 2014 çулта çулсене тытса тăрас енĕпе электронлă уçă аукционсем иртмелле.
Леонид Николаев ку ĕçе вă-хăтра пурнăçламаллине палăртнă.
Ытти ыйтупа Шалти ĕçсен министерствин «Вурнарский» пайĕн полици начальникĕн заместителĕ Андрей Сорокин çулсем çинчи лару-тăру, район тĕп больницин тĕп врачĕ Николай Тинюков грипран тата ОРВИрен тÿлевсĕр прививкăсем тăвасси малалла пыни çинчен каланă.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии