13:52 29 ноября 2013 г.
Район администрацийĕн тĕпелĕнче Вăрнар тăрăхĕнче вулакан район туса хурассишĕн сăмах пуçарнине ырлатăп. Вăрнарсем ĕмĕртен вулакан халăх шутланнă. Районăн пирвайхи «Социализм çулĕпе» хаçатне 1930 çулта 1-мĕш номертенех харăссăн 700-ĕн çырăннă. Вăрçă çулĕсенче ку кăларăм чи пысăк тиражли пулнă. Иртнĕ ĕмĕрĕн иккĕмĕш çурринче тираж 8 е 10 пине капашатчĕ. Çĕнĕ ĕмĕртен тăрук ултă-çичĕ хут чакса ларчĕ. Юрать-ха, юлашки пилĕк-ултă çулта пĕрмай ÿссе пырать – ĕнтĕ тăватă пинтен иртрĕ. Халăхăн хальхи йышне кура, ман шутпа, ăна вулакансен йышĕ 5 пинрен кая мар пулма кирлĕ. Иртеменкассинчи çыхăну уйрăмĕ паянхи куна «Çĕнтерÿ çулне» 100 экземпляра та çитермен-ха, çырăнтарăва çынсене тимлĕрех явăçтарасчĕ. Почтальонсемсĕр пуçне кашни ялта çырăнтару агенчĕ тупма пулать.
Эп хам астăвасса, кĕсьере укçа тытмалăх ĕçлеме пуçланăранпа, çуллен 10–12 тĕрлĕ хаçат-журнал çырăннă. Чăваш журналĕсене пурне те килте вуланă. Юлашки çирĕм çулта «Çĕнтерÿ çулĕ», «Советская Чувашия», «Аргументы и факты» хаçатсене илсе тăратăп. Район хыпарçи кашни çемьерех пултăрччĕ. Кун пирки почта уйрăмĕпе вырăнти ял хуçалăх предприятийĕнче пĕрле шухăшласа пăхмалла, хăшпĕр киле пулăшма Вячеслав Васильев хирĕç пулмасть пулĕ тетĕп. Кирек хăш фермер та, предприяти те çывăхри тăван шкула «Çĕнтерÿ çулĕ» хаçатпа «Тăван Атăл» журнала çырăнса пама пултарать. Вăхăт пур-ха – çак пĕр-икĕ эрне хушшинче ĕлкĕресчĕ.
Эп – вулакан ялшăн. Вулакан ялсемпе вулакан район туса хурăпăр. Çыннăн культури вуланинче, нумайрах пĕлме тăрăшнинче-çке-ха. Нумайрах пĕлекен ĕçре те пултаруллă.
Н.ВИКТОРОВ.
Чăрăшкас Мăрат.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии