09:11 27 ноября 2013 г.
Анне кунне халалласа районти культурăпа кану центрĕнче уяв каçĕ çав тери чаплă иртрĕ.
Вăл район администрацийĕн пуçлăхĕн тивĕçĕсене пурнăçласа пыракан Вячеслав Горбуновăн салам сăмахĕсенчен пуçланчĕ. «Амăшлĕх – çут çанталăк хĕрарăма кÿнĕ чи пысăк парне. Пĕтĕм пурнăç тăршшĕпе эпир хамăрăн аннесене юратушăн, тимлĕхшĕн, ачашлăхшăн тав тăватпăр», – терĕ вăл. Кăçал районта 206 арçын ача тата 183 хĕрача çуралнă, 160 çемье йышлă пулса тăнă, 192 çемье амăшĕн капиталне тивĕçнĕ.
Уяв сцени çинче республикăри амăшĕн капиталĕн сертификачĕсемпе Санарпуçĕнчи Евгения Аввакумована чысларĕç, кăçал унăн виççĕмĕш ача кун çути курнă.
«Раççей çар служащийĕсен амăшĕсен канашĕ» обществăлла организацийĕн Тав çырăвне Ираида Евграфована, çĕршыв умĕнчи тивĕçе пурнăçланă вăхăтра Алексей ывăлне çухатнăскере, пачĕç.
Районти вĕрентÿ тытăмĕнче 20 çул ытла тимлекен Елена Карпова «Ĕç ветеранĕ» ята тивĕçрĕ.
Анне кунĕ тĕлне «Асламăшĕсем тата мăнукĕсем» конкурс хатĕрленĕ. Унта Нина Зайцева хăйĕн 10-ри Никита, Лилия Маслячкина 7-ри Юля, Елена Осипова 4-ри Анечка, Валентина Пелевина 7-ри Даниил, Светлана Маслячкина 8-ти Дима тата Зоя Белякова 13-ри Даниил мăнукĕсемпе хутшăннă.
Конкурс тăватă тапхăрпа иртрĕ: вĕсем хăйсемпе юрă-ташă-сăвă урлă паллаштарчĕç, «Асанне юмахĕсенче» юмах сăнарĕсене калăпларĕç, чун туртакан ĕçĕсене пĕлтерчĕç, асламăшĕ-кукамăшĕсем мăнукĕсене вĕрентнĕ юрри-ташши-сăввисене кăтартрĕç.
Вĕсене çирĕп жюри – район администрацийĕн пуçлăхĕн тивĕçĕсене пурнăçласа пыракан Вячеслав Горбунов, халăха социаллă хÿтлĕх паракан районти пайĕн пуçлăхĕ Ирина Смолина, Вăрнарти историпе краеведени музейĕн директорĕ Елена Шарипова тата Галина Виноградова балетмейстер тĕрлĕ номинацире хакларĕ, дипломсемпе чысларĕ.
«Атте-анне ĕçре, асанне яланах юнашар, вăл – манăн юлташ», – терĕ çамрăк конкурсантсенчен пĕри. Чăн та, вĕсем юнашар пурри телей те çăмăллăх.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии