10:04 25 ноября 2013 г.
Иртнĕ эрнере Чăваш Республикин ял хуçалăх министерствинче выльăх-чĕрлĕх отраслĕн вунă уйăхри ĕç-хĕлне пĕтĕмлетнĕ. Унта район администрацийĕн пуçлăхĕн тивĕçĕсене пурнăçлакан – ял хуçалăхĕпе экологи пайĕн пуçлăхĕ Вячеслав Горбунов, тĕп специалист-эксперчĕ Георгий Романов, Вăрнарти аш-какай комбиначĕн генеральнăй директорĕ Николай Аливанов, «Вурнары Завод СОМ» генеральнăй директорĕ Федор Волков, «Янгорчино» тата К.Маркс ячĕллĕ хуçалăхсен председателĕсем Геннадий Романовпа Валерий Шумилов хутшăннă.
Ларура Чăваш ене ерекен чирсем илсе килессинчен сыхланасси пирки калаçнă, çавăн пекех патшалăх статистикине сведенисем тăратнă чухнехи ыйтусене сÿтсе явнă.
Вунă уйăхри кăтартусемпе, статистика даннăйĕсем тăрăх, аш-какай туса илессипе район виççĕмĕш вырăнта. Пĕтĕмпе çак тапхăрта 2632 тонна аш-какай туса илнĕ тата сутнă. Пĕлтĕрхинчен 23 процент ытларах. Сĕт туса илессипе тата вырнаçтарассипе – пиллĕкмĕш, мăйракаллă шултра выльăх шучĕпе – тăваттăмĕш, вăл шутран ĕнесен тата сыснасен йышĕпе – виççĕмĕш вырăнсенче.
Ларура çавăн пекех кадрсемпе тивĕçтерес ыйтăва та çĕкленĕ. Районти ял хуçалăх предприятийĕсенче зооветспециалистсем, выльăх фермисен механизаци инженерĕсем тата сĕт пахалăхне палăртакан лаборантсем çитмеççĕ.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии