09:02 25 ноября 2013 г.
Çул-йĕр предприятийĕ ĕçлеме пуçланăранпа 25 çул тултарнине ĕнер паллă турĕ. 1983 çулта Çĕмĕрлери ДПМК Вăрнар районĕнче çул-йĕр участокĕ уçнă. Пысăках мар коллектива Вячеслав Данилов ертсе пыма тытăннă.
– Ун чухне пысăк çулсем тунă. Вăрнара чукун çулпа вакунĕ-вакунĕпе вак чул килетчĕ. Ăна пушатма халăх çитменнипе колхозсенчен пулăшу ыйтнă, – аса илет Геннадий Вазанов прораб. – Республикăра асфальт çул сарасси сарăлнипе ĕç нумайччĕ.
1988 çулта, хĕлле, вăй илсе ура çине тăнă участокран акционерсен уçă пĕрлешĕвĕ йĕркеленнĕ. Предприятие ертсе пыма малтанхи тапхăрта Вячеслав Данилова, унтан Иван Куликова шаннă. Иван Николаевич яваплă ĕçре çирĕм çул ытла вăй хунă, «Чăваш Республикин тава тивĕçлĕ строителĕ» хисеплĕ ята тивĕçнĕ. Çак тапхăрта пĕрлешÿ пурлăхпа техника никĕсне çирĕплетессипе, коллектива пысăк квалификациллĕ çынсене явăçтарассипе сулмаклă утăм тума ĕлкĕрнĕ, асфальт завочĕ хута кайнă. Юсав мастерскойĕ, лаборатори, хăватлă техника паркĕ, гараж, столовăй, складсем... Республикăри çул-йĕр тăвакан организацисен ăмăртăвĕнче вăрнарсем малти вырăнсене сахал мар йышăннă.
Икĕ çул каялла «Вурнарыдорстрой» пĕрлешÿ Ольга Куликовăн çирĕп аллине куçнă. Паян вăл Иван Николаевич хывнă çулпа малалла, ырă йăлана тытса пырать.
Кăçал пĕрлешÿ аукционра Вăрнар районĕнчи Юпшик Ялтăрара çул тума выляса илнĕ. Унăн пĕтĕмĕшле хакĕ 15 млн тенкĕ. Республикăпа район бюджечĕсенчен 5,5 млн тенкĕ уйăрнă.
Район çулĕсен тăршшĕ – 187 çухрăм, çав шутра 130-ăшне «Вурнарыдорстрой» пăхса-юсаса тăрать. Поселокри сарлака çула та (28 çухрăм) пĕрлешĕве шанса панă. Юлашки вăхăтра К-701 трактор, КДМ Ко–829А автомобиль, Р-310М, икĕ «Газель» тата ыттине туяннă. Икĕ экскаватора юсаса хута янă.
Куликовсем çемйипех тенĕн çул тунă çĕрте. Аслă пĕлÿллĕ специалистсем – Анастасия, Екатерина, Алексей – ашшĕ-амăшĕн пархатарлă ĕçне малалла тăсаççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии