08:53 25 ноября 2013 г.
Хăйсен професси уявĕнче налук службин ĕçченĕсем пĕр кунлăха вĕрентекенсем пулса тăчĕç. Кĕçнерни кун Пĕтĕм Раççейри вĕренÿ учрежденийĕсенче, çав шутра Чăваш енре те, Налук пĕлÿлĕхĕн урокĕсем иртрĕç. Хамăр районта – Вăрнарти 2-мĕш тата Калининăри шкулсенче.
Çакăн евĕр уроксене налукçăсем 2002 çултанпа йăлана кĕртнĕ, вĕсенче ачасене налуксен социаллă пĕлтерĕшне, налук саккунĕсене пурин те çирĕп пăхăнмаллине ăнлантараççĕ. Акци тĕллевĕ – çамрăк ăрăва Раççейри налук службин историйĕпе кăсăклантарасси, налук çинчен пĕлĕве анлăлатма пулăшасси.
Вăрнарти 2-мĕш шкулта вĕренекенсемпе акци йĕркипе Федераллă налук службин районсем хушшинчи 3-мĕш инспекцийĕн пуçлăхĕн заместителĕ Лариса Иванова тĕл пулчĕ. Ачасене вăл çĕршыври налук политикипе паллаштарнă май «Налук ыйтăвĕсене лайăх пĕлекенсен клубне» кĕме йыхравларĕ. Анчах кунта лекме çăмăл мар – вĕренекенсен кăткăс тĕрĕслев-конкурссем витĕр тухма тиврĕ, налук тÿлеме чĕнсе калакан реклама слоганĕсем те шутласа тупрĕç. Çамрăк пулин те налук ыйтăвĕсене çăмăллăнах сÿтсе явма пултарнине, ку тÿлевсене пухнин кирлĕлĕхне ăнланнине кăтартрĕç вĕсем. «Çынсем мĕншĕн налук тÿлеме юратмаççĕ», «Налук тÿлеме юратманнисене çĕршыв мĕншĕн юратмасть», «Хăвăр хулари е районти пурнăçа улăштарма мĕнле çĕнĕ налуксем кĕртнĕ пулăттăр» темăсемпе тухса калаçни уйрăмах интереслĕ пулчĕ. «Паянхи вĕренекенсен шухăшлавĕ тĕлĕнмелле пуян, ăна çăмăллăнах уçса пама тата пĕлтерме пултараççĕ. Налукпа çыхăннă ыйтусем те вĕсемшĕн пачах йывăр марри курăнчĕ, пĕлÿ шайĕ те анлă», – мухтарĕ инспекци пуçлăхĕн заместителĕ Лариса Иванова.
Паянхи налук тÿлекен – электронлă тивĕçтерÿсемпе хастар усă куракан çын. Çавăнпа та Л.Иванова интернет урлă (www.nalog.ru сайтра) килтен тухмасăрах Федераллă налук службин тивĕçтерĕвĕсене илме май пуррине пĕлтерчĕ.
Вĕренекенсем ăна професси уявĕ ячĕпе саламласа хăйсене налук пĕлÿлĕхне тарăнлатма пулăшнăшăн тав турĕç.
Калининăри шкулта урока инспекци пуçлăхĕн налук тÿлекенсемпе ĕçлекен тата регистраципе учет пайĕн пуçлăхĕ Лариса Кудрявцева хутшăннă.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии