10:32 20 ноября 2013 г.
Шăмат кун Патăрьелĕнче «Урожай» ДСО парнисемшĕн волейбол енĕпе хĕрарăмсем
ăмăртнă. Хамăр район чысне унта Марина Паймулкина, Мария Мефодьева, Валентина
Волкова, Анна Григорьева, Аксенья Иванова, Екатерина Маркова тата Екатерина
Лукина хÿтĕленĕ. Шел те, финалта вĕсем турнир хуçисене выляса янă – çĕнтерÿ
пьедесталĕн иккĕмĕш пусми çине хăпарма тивĕçнĕ.
Канмалли кунсенче ирĕклĕ майпа кĕрешекенсем Шăхасанта иртнĕ кĕрешÿ
фестивальне хутшăннă. Унта пĕр вăхăтрах Геннадий Смирнова асăнса арçын ачасем
хушшинче республика турнирĕ тата Чăваш ен первенстви иртнĕ.
Уçă турнирта вăрнарсен виçĕ медаль – Алексей Красновпа Дмитрий Шерстневăн
«кĕмĕлсем» (Сергей Васильев патĕнче вĕренеççĕ) тата Никита Львовăн «бронза»
(тренерĕ – Юрий Львов).
Чăваш ен первенствинче çĕнтерÿ пьедесталĕ çине улттăн хăпарма тивĕçнĕ:
Анастасия Иванова тата Яна Лукина – пĕрремĕш, Регина Краснова – иккĕмĕш, Тимур
Сергеев, Марина Осипова тата Василий Михайлов виççĕмĕш пусмасем çине. Ку
çамрăксем Юрий Львовпа Виталий Трофимов тренерсен воспитанникĕсем.
Районта вара çак кун сĕтел çи теннис енĕпе чемпионат иртнĕ. Унта арçынсенчен
32-ĕн, хĕрарăмсем 6-ăн хутшăннă. Пĕтĕмĕшле зачетпа турнир çĕнтерÿçи спорт
мастерĕн кандидачĕ Дарья Феофанова пулса тăнă, вăл этемлĕхĕн илемлĕ çуррине кăна
мар, вăйлă çуррине те хăйĕнчен иртме паман.
Иккĕмĕш вырăнта Вăрнарти Василий Кокин, виççĕмĕшĕнче – Пăртасри Валерий
Медведев.
Çамрăксене шашкăпа туслаштаракан Григорий Иванович Степанов ентешсене каллех
савăнăçлă хыпар пĕлтерчĕ. Иртнĕ эрнере унăн вĕренекенĕсем Тутарстан
первенствинче пысăк ăсталăх кăтартма пултарнă. Чăваш енĕн нумай хутчен чемпионки
тата призерĕ, Пĕтĕм тĕнчери турнир призерĕ Ирина Иванова 1994–1997 çулсенче
çуралнă хĕрсем хушшинче иккĕмĕш вырăн йышăннă.
Григорий Ивановичăн мăнукĕ Танзиля Замалиева, тĕнче турнирĕн иртнĕ çулхи
кĕмĕл призерĕ, кÿршĕлле республикăра хăйĕн ушкăнĕнче виççĕмĕш пулнă.
Эрне кун шкул ачисен спартакиади йĕркипе Чăваш ен Пуçлăхĕн Кубокне çĕнсе
илессишĕн баскетбол енĕпе район шайĕнчи вăйăсем иртнĕ. «КЭС-БАСКЕТ» вун икĕ
команда пуçтарнă. Вăрнарти 1-мĕш шкулта вĕренекенсем волейболла кăна мар, ку
тĕсре те чи ăстисем пулнине çирĕплетнĕ.
Хапăс шкулĕн команди – иккĕмĕш, Кÿстÿмĕр шкулĕн команди виççĕмĕш вырăнсенче.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии