14:52 15 ноября 2013 г.
Юн кун районти культурăпа кану центрĕн залĕнче пушар хуралĕн ĕçченĕсен тăватă
ăрăвĕ тĕл пулчĕ: аслă ветерансем, пенсие анчахрах тухнă «çамрăк» ветерансем,
паянхи сотрудниксем тата пушарпа кĕрешекенсен пулас ăрăвĕ – шкулсенче
вĕренекенсем. Тĕл пулăва Раççей МЧС-ĕн республикăри тĕп управленийĕ йĕркеленĕ,
ăна ведомство ертÿçи Станислав Антонов генерал-майор ертсе пычĕ.
Вăл каланă тăрăх, çакăн пек мероприятие йăлана кĕртес шухăш виçĕ çул каялла,
районсенчи пушар хуралĕсенче тимлекенсемпе тата ветерансемпе вырăнсенче курса
калаçнă май çуралнă. Унтанпа кашни районта тенĕ пекех иртнĕ вĕсем. Малтанах
калаçусем икĕ енлĕ кăна пулнă – аслăрах ăрурисем паянхи сотрудниксен службипе
паллашса сĕнÿ-канашсем панă. Каярахпа тĕрлĕ çулти ветерансене уйрăммăн
хутшăнтарнă, вĕсен аса илĕвĕсемпе вĕрентсе каланисем çамрăк ăрăва патриотла
воспитани парас ĕçре пулăшнине шута хурса тĕл пулусене ачасене те явăçтарма
тытăннă.
Вăрнарти уявра пушар хуралĕн ĕçченĕсен пĕрремĕш тата иккĕмĕш ăрăвĕсен ячĕпе
управлени çумĕнчи ветерансен канашĕн председателĕ Георгий Фадеев тата унăн
заместителĕ Василий Нягин сăмах илчĕç. Иккĕшĕ те нумай çул çынсен хăрушсăрлăхне
тивĕçтерессипе, инкексемпе чрезвычайлă лару-тăрусене асăрхаттарассипе вăй хунă.
Çамрăк ăрушăн хисеплĕ ветерансем – хăюлăхпа хастарлăх тĕслĕхĕ, мĕн ачаран сывă
пурнăç йĕркине тытса пыма хăнăхнăскерсем, спортпа туслăскерсем паян та вăй-халпа
та, чунпа та çирĕп. Юрă-ташша ăста, Раççейри пултарулăх конкурсĕсенче малти
вырăнсене йышăнаççĕ, МЧС-ăн республикăри управленийĕн «Çулăм» ансамблĕн йышĕнче
концертсемпе районсене те, республика тулашне те тухса çÿреççĕ. Георгий Фадеев
пурнăçне йывăр та кăткăс службăпа çыхăнтарнă пулин те, чунпа – поэт, юрăç,
артист... Сăвăсем хайлать, кĕнекесем кăларать, унăн юррисем радио-телевиденипе
янăраççĕ. Василий Нягин вара хăйне Вăрнар районĕ çав тери çывăх пулнине
пĕлтерчĕ. Служба кун-çулĕ унăн шăпах хамăр районтан пуçланнă мĕн. Икĕ ача
пурнăçне татнă пĕрремĕш пушар, ун чухнехи ятлă-сумлă колхозсен çĕршывĕпе паллă
председателĕсемпе хăрушсăрлăх енĕпе ĕçлени... – шалти службăн отставкăри
полковникĕн аса илмелли нумай.
Ку тытăмри районти ветерансен канашĕн ертÿçи Юрий Михайлов та спортпа туслă
пулни хăйне пушар хуралĕн сотрудникĕсене хатĕрлекен училищĕне лекме пулăшнине,
Вăрнарта пушар чаçне мĕнле йĕркеленине каласа пачĕ. Тĕл пулури виççĕмĕш ăру
представителĕ – асăрхав ĕçĕ-хĕлĕн районти уйрăмĕн пуçлăхĕ Александр Шурдеев –
хамăр районта хальхи вăхăтра пушарсемпе кĕрешекенсен, инкексене асăрхаттарассипе
ĕçлекенсен службипе паллаштарчĕ. Сăмах май, уйрăмах палăрнă сотрудниксене уявра
тĕрлĕ наградăпа чысларĕç. Гражданла оборона енĕпе тата чрезвычайлă лару-тăрусене
асăрхаттарассипе тивĕçсене тÿрĕ кăмăлпа пурнăçланăшăн Вăрнарти 27-мĕш пушар
чаçĕн пожарнăйне Андрей Иванова, Геннадий Сергеев водителе С.Антонов
генерал-майор «Василий Чуйков маршал» медальпе наградăларĕ. Хисеп грамотине
тивĕçнисем: Всеволод Кондратьев водитель, уйрăм командирĕ Алексей Рыбаков.
Çамрăксене патриотла воспитани парас ĕçе хастар хутшăннăшăн Юрий Михайлов,
Геннадий Николаев, Аркадий Еремеев, Николай Александров, Анатолий Елахов пушар
хуралĕн ветеранĕсене Тав хучĕсемпе хавхалантарчĕç. Çавăн пекех район
администрацийĕн пуçлăхĕн тивĕçĕсене пурнăçлаканĕ Вячеслав Горбунов Алексей
Петров инспектора, караул пуçлăхне Александр Семенова, Владимир Ильин диспетчера
Хисеп грамотисемпе чысларĕ.
Тăватă ăру тĕл пулăвĕ концертпа вĕçленчĕ. Калининăри шкулти А.Григорьев
ячĕллĕ кадет класĕнче вĕренекенсем пушарсемпе кĕрешекенсен çăмăл мар ĕçне
мухтаса сăвăсем вуларĕç, çар хатĕрленĕвĕ енĕпе маттуррине кăтартса
плац-концертпа паллаштарчĕç. Районти культурăпа кану центрĕн артисчĕсем те
хăйсен хÿхĕм юрри-ташшипе савăнтарчĕç. Район сцени çине пĕрремĕш хут МЧС-ăн
республикăри тĕп управленийĕн «Çулăм» ансамблĕ хăйĕн пултарулăхĕпе тухрĕ.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии