15:30 12 ноября 2013 г.
Шалти ĕçсен министерствин муниципалитетсем хушшинчи «Вурнарский» пайĕн
сотрудникĕсем иртнĕ эрнере савăнăçлă лару-тăрура професси уявне паллă тунă.
Йăлана кĕнĕ тăрăх, службăра палăрнисене праçник тĕлне грамотăсемпе тата
медальсемпе наградăланă, йĕрке хуралçисем ячĕпе салам сăмахĕсем янăранă, уява
районти культурăпа кану центрĕн артисчĕсем юрă-ташăпа илемлетнĕ. Халĕ йĕркелĕхе
тивĕçтерессипе тимлекен сотрудниксемпе пĕрле преступноçпе кĕрешессипе чылай çул
тăрăшнă пенсионер-ветерансене те тивĕçлипе чысланă. «Вурнарский» пайăн полици
пуçлăхĕ Д.Фирсов полици подполковникĕ ĕçтешĕсене саламланă май çĕршыв-республика
ертÿçисем, министерство палăртакан задачăсене пысăк яваплăхпа пурнăçланăшăн тав
тунă. Енчен те ку çăмăл мар профессине суйласа илнĕ-тĕк, граждансен хÿтлĕхне
тата лăпкăлăхне тивĕçтерме, саккуна пăсакансемпе хирĕç кĕрешме кашнин хăйĕн
тÿпине хывмаллине палăртнă.
«Вурнарский» пай асăрхавра тытакан Вăрнар тата Элĕк районĕсенче акă кăçалхи
вунă уйăхра преступленисем пĕлтĕрхи çак тапхăртинчен кăшт сахалрах çырăннă. Çав
шутра январь – октябрь уйăхĕсенче уйрăмах йывăр тата (30,8 :), йывăр (20,9 :)
преступленисем, ют пурлăха вăрланă тĕслĕхсем, ултавлă ĕçсем тата ытти ушкăнрисем
чакнă. Преступленисене çийĕнчех уçса парассин шайне те пысăклатма пултарнă
вырăнти полицейскисем – 88 процента çитернĕ. Апла пулин те преступленисене, çул
çинчи инкексене асăрхаттарассипе, çула çитменнисене киревсĕр çул çине тăма парас
мар тесе ытларах тимлемеллине те тĕллеве кăлараççĕ.
Шалти ĕçсен органĕсен сотрудникĕсене професси уявĕпе çавăн пекех район
администрацийĕн пуçлăхĕн заместителĕ Н.Петров тата обществăлла канаш
председателĕ Ю.Никифоров саламланă, районта саккунлăха тата йĕркелĕхе çирĕплетме
малашне те хăйюллăн тата хастар ĕçлеме суннă.
Сăмах май, «Вурнарский» пай çумĕнчи обществăлла канаш Шалти ĕçсен органĕсен
сотрудникĕн кунĕ тĕлне ачасем хушшинче «Полици пулăшма васкать» ятпа пултарулăх
конкурсне ирттернĕ. Шкулсенче вĕренекенсем полици ĕçне сăнласа ÿкерчĕксем
хатĕрленĕ, сăвă-калав çырнă, ал ĕçĕсем ăсталанă. Ачасен ĕçĕсене уяв залĕнче
ятарлă курава пухнă, çĕнтерÿçĕсене вара обществăлла канаш ячĕпе грамотăсемпе
тата пылак парнесемпе хавхалантарнă. Полицейскисене урамсенче тата обществăлла
вырăнсенче йĕркелĕхе тивĕçтерме пулăшакан чи хастар дружинниксене те
хавхалантарусăр хăварман.
Шалти ĕçсен министерствин «Вурнарский» пайĕн сотрудникĕсенчен службăра
хăйсене чи лайăх енчен кăтартнисене вара район, республикăри министерство
грамотисемпе, «Службăра палăрнăшăн» медальпе наградăланă.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии