15:24 12 ноября 2013 г.
Ĕç эрнин пуçламăшĕнче ирттернĕ планеркăна район администрацийĕн пуçлăхĕн
тивĕçĕсене пурнăçласа пыракан Вячеслав Горбунов иртнĕ эрнери паллă пулăмсене
пĕтĕмлетнинчен пуçланă. Тĕп мероприятисем – районта иртнĕ Чăваш ен культура
министерствин кунĕ тата Шалти ĕçсен органĕсен ĕçченĕн кунĕ.
Пушар хăрушсăрлăхĕн ыйтăвне хускатнă. Асăрхав ĕçĕ-хĕлĕн районти уйрăмĕн
ертÿçи Александр Шурдеев пĕлтернĕ тăрăх, кăçал районта «хĕрлĕ автан» 33 хутчен
алхаснă (пĕлтĕрхи ку тапхăртинчен 10 сахалрах). Пушарсен 83 проценчĕ уйрăм
çурт-йĕрте тухнă, çавăнпа та пурăнмалли секторта планланă тĕрĕслевсем пыраççĕ.
Уйрăмах ăнăçсăр çемьесен, пĕччен пурăнакан ватăсен тата инвалидсен килĕсене
тимлĕн тĕрĕслеççĕ.
Пушар хăрушсăрлăхĕн требованийĕсене пăснăшăн 112 административлă протокол
çырнă. 600 пин ытла тенкĕлĕх штраф хунă.
Кăçал çавăн пекех муниципаллă культура учрежденийĕсенче тĕплĕ тĕрĕслевсем
пыраççĕ.
Вăрнар хула поселенийĕн пуçлăхĕ Алексей Владимиров пушар асăрхавĕн уйрăмĕпе
тачă çыхăнса ĕçленине, пĕрле общежитисене, уйрăм секторти çуртсене тĕрĕсленине
каланă.
Ноябрĕн 10–20-мĕшĕсенче çула çитмен çамрăксемпе ĕçлекен комисси районта
«Ачасем тата çемье» акци ирттерет. Сектор заведующийĕ Андрей Матвеев мероприятин
тĕп тĕллевĕсене палăртнипе пĕрлех комисси ялсене тухса нумай ачаллă, ăнăçсăр
çемьесенче пулнине, вĕсен ыйтăвĕсене тимлĕхе илнине палăртнă.
Шел те, пирĕн хушăра социаллă тăлăхсем те пурăнаççĕ. Шалти ĕçсен министерствин «Вурнарский» пайĕн пуçлăхĕн заместителĕ Андрей Сорокин пĕлтернĕ тăрăх, Вăрнарта акă 15 çулхи çамрăк пĕчченех пурăнать, вăл виçĕ хутчен преступлени тума ĕлкĕрнĕ. Амăшĕ яланах çул çÿревре. Ку çемье – профилактика субъекчĕсен тимлĕхĕнче. Хальхи вăхăтра амăшĕ тĕлĕшпе ачине тивĕçлĕ пăхманшăн уголовлă явап тыттарас ĕç пырать.
Районти тĕп библиотекăра çак акци йĕркипе пĕчĕк ача амăшĕсемпе профилактика
ĕçне ирттерессине плана кĕртнĕ. Кăçал, шел те, районта çулталăка çитмен тăватă
ача вилнĕ. Иккĕшне амăшĕсем çывăрнă чух хăйсем çумне хунă. Медицина ĕçченĕсем
амăшĕсене пепкисене пăхас правилăсене тепĕр хут тăнлантарĕç.
Планеркăра загс пайĕн вунă уйăхри ĕç-хĕлне те пĕтĕмлетнĕ. Кăçал çураласлăх
ÿснĕ. Пурнăçран уйрăлакансен шучĕ пĕлтĕрхи çак тапхăртипе танлаштарсан чакнă
пулин те 517 çыннăн кун-çулĕ татăлнă. Хĕрарăмсен вăтам пурнăç тăсăмĕ – 74 çул,
арçынсен – 62.
Пай пуçлăхĕ Алевтина Степанова электронлă архив тăвассипе пысăк ĕç
пурнăçланине, вунă уйăхра унта 48,7 пин запись кĕртнине пĕлтернĕ.
Планеркăна ку эрнери плансене палăртнипе вĕçленĕ.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии