10:43 11 ноября 2013 г.
Виçĕм кун Чăваш ен Строительство министерствин коллеги ларăвĕнче республикăри
строительство комплексĕн ĕç-хĕлне пăхса тухнă. Олег Марков министр хăйĕн
сăмахĕнче Чăваш ен çурт-йĕр хута ярассипе Атăлçи тăрăхĕнче малта пынине, ку
позицие сыхласа хăвармаллине каланă.
Кăçал пĕтĕмпе 864 пин тăваткал метр пурăнмалли лаптăк тумалла. Тăхăр уйăхра
457, 831 пин тăваткал метрне хута янă. Малашлăхра эконом класлă çурт-йĕр
çĕклессине хавхалантарассине, 2013–2017 çулсенче çакнашкал çуртсен хакне
чакарассине палăртнă.
Çурт-йĕр строительствине пулăшас тĕллевпе Раççей строительство тата ЖКХ
министерстви пилотлă проекта хутшăнас текен застройщиксене суйлать. Тĕп услови –
çурт-йĕрĕн 50 процентне тăваткал метршăн 30 пинтен ытларах мар хакпа çĕклессине
шантарни. Эконом класлă çурт-йĕр тăваткал метрĕн пасар хакне 2013 çулта 9,4
процент, 2014 çулта 12,5, 2015 çулта 15,7 процент чакарма май парĕ.
Хальхи вăхăтра проекта икĕ застройщик кăна – «Чăваш Республикин ипотека
корпорацийĕ» тата «ПМК-8» тулли мар яваплă общество – хутшăнма кăмăл тунă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии