09:06 06 ноября 2013 г.
«Эпир çамрăк чух салтака илсе каймасран питĕ хăраттăмăр. Ун пеккисем хисепре пулман, хĕрсем те килĕштермен вĕсене. Халĕ вара пачах урăхла: салтак атти тăхăнассинчен таракансемех вĕçкĕнленсе-мухтанса çÿреççĕ, хăйсене паттăрла тытаççĕ», – тенине аслăрах ăрури çынсенчен тăтăшах илтме пулать. Апла пулин те ашшĕ-амăшне, шăллĕ-йăмăкĕсене, тăнăç пурнăçа хÿтĕлессине хăйсен тивĕçĕ тесе шутлакансем паянхи çамрăксем хушшинче те сахал мар.
Хамăр районтан кăçалхи кĕркуннехи призыв тапхăрĕнче Раççей Çарĕн ретне 62 каччăн тăмалла. Службăна чи малтан тухса каякансем повесткăсене алла илнĕ ĕнтĕ – призыв пунктне вĕсен ноябрĕн 11-мĕшĕнче пухăнмалла. Çамрăксене çĕршыв хÿттинче тăма ăнăçу тата ырлăх-сывлăх сунса ăсатас тĕллевпе районта юн кун Призывник кунĕ иртрĕ. Çара каякансен ячĕпе районти культура çурчĕн сцени çинчен хавхалантаруллă ырă сăмахсем чылай илтĕнчĕç, патриотла юрăсем шăранчĕç.
Район администрацийĕн пуçлăхĕ Леонид Николаев призывниксене çĕршыв умĕнчи тивĕçе ашшĕ-амăшĕн, район-республика ят-чысне ямасăр тивĕçлĕ пурнăçлама сунчĕ. Сирĕн служба вырăнĕнчен района командирсем тав сăмахĕсем çырнă çырусем кăна килсе тăччăр, терĕ. Республикăри çар комиссариачĕн Вăрнар тата Йĕпреç районĕсенчи пайĕн пуçлăхĕ Владимир Венедиктов çамрăксене çулталăк хушшинче вăй-хал енчен çирĕпленсе тата вăхăта хăйсемшĕн усăллă та вĕрентÿллĕ ирттерсе таврăнма сĕннипе пĕрлех çар ĕçĕ кăмăла кайсан пурнăçа çак профессипе çыхăнтарасси çинчен шутлама ыйтрĕ. Çавăн пекех район администрацийĕн вĕрентÿпе çамрăксен политикин пайĕн пуçлăхĕ Николай Иванов, районти ветерансен тата пенсионерсен канашĕн председателĕ Александр Ильин призывниксене ăнăçу тата çирĕплĕх сунчĕç, Калининăри чиркÿ настоятелĕ Сергий атте вĕсене службăна йĕркеллĕ ирттерсе тăван киле чĕрĕ-сывă таврăнма пиллерĕ.
И.ЯКОВЛЕВА.
сăн ÿкерчĕкре: Алексей Войтенко тата Анатолий Носов çывăх вăхăтра çара кайма хатĕрленеççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии