09:01 06 ноября 2013 г.
Раççейре Пĕрремĕш тĕнче вăрçинче пуç хунă салтаксене асăнса монумент тума тытăннă. Раççей культура министрĕ Владимир Мединский ун проекчĕпе паллаштарнă, çĕршывра пурăнакансене палăка пĕрле тума чĕнсе каланă. Укçа-тенке Раççей çар-истори обществи пухать. Ку ĕçе пурнăçлама Мускав правительстви, коммерцилле организацисем, уйрăм çынсем хастар пулăшаççĕ. Паянхи кун тĕлне 7,5 миллион тенкĕ пуçтарнă.
Палăка Мускаври Поклоннăй сăртĕнче вырнаçтарĕç. Колонна çинче Пĕрремĕш тĕнче вăрçин салтакне халалланă палăк пулĕ, скульптура композицийĕ Раççей Ялавне тата темиçе барельефа пĕрлештерĕ. Проект тăрăх, колонна çÿллĕшĕ – 13–15 метр, палăкăн иккĕмĕш пайĕ – 12 метр. Скульптура – бронзăран.
В.Мединский сăмахĕ тăрăх, палăка Пĕрремĕш тĕнче вăрçи пуçланнăранпа 100 çул çитнĕ тĕле (2014 çулхи июль) туса пĕтерме, августăн 1-мĕшĕнче уçма палăртаççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии