08:46 06 ноября 2013 г.
Юпа уйăхĕн 28–30-мĕшĕсенче Раççей Федераци Пухăвĕн Федераци Канашĕнче Чăваш Республикин кунĕсем иртрĕç. Çавна май комитетсен анлă ларăвĕсенче пирĕн Правительство членĕсем, ЧР Патшалăх Канашĕн депутачĕсем тухса калаçнă.
Мускавра Раççей Федераци Канашĕнче Чăваш Республикин кунĕсен йĕркипе Чăваш ен Пуçлăхĕ Михаил Игнатьев Федераци Канашĕн Председателĕпе Валентина Матвиенкăпа тĕл пулнă.
Калаçура Чăваш енĕн социаллă пурнăçĕпе экономикин хальхи тăрăмне, Раççей парламенчĕн çÿлти палати республикăн саккун тата общество пуçарăвĕсене пулăшассин ыйтăвĕсене сÿтсе явнă.
Валентина Матвиенко Чăваш ен хăйне федераци шайĕнче мĕнле паллаштарнине ырăпа хакланă, Федераци Канашĕнче Чăваш Республикин кунĕсем питĕ ăнăçлă иртнине тата лайăх кăмăл-туйăм çуратнине палăртнă. «Ку – республика çитĕнĕвĕсем пирки çеç мар, регионти йывăрлăхсем çинчен те каласа кăтартмалли мел. Çак информаци федераци субъекчĕсенчи лару-тăрăва тĕрĕс ăнланмашкăн, малашне ăнăçлă йышăнусем тумашкăн кирлĕ»,– тенĕ Раççей Федераци Пухăвĕн çÿлти палатин спикерĕ. Вăл çавăн пекех Чăваш енре нацисен тата конфессисен хушшинче килĕшÿлĕхпе çураçулăх хуçаланнине, ку опытпа ытти регионра та усă курмаллине пĕлтернĕ.
Юн кун Валентина Матвиенкăпа Михаил Игнатьев РФ Федераци Пухăвĕн Федераци Канашĕнче Чăваш енĕн презентаци-куравне официаллă майпа уçнă çĕре хутшăннă.
Чăваш Республики икĕ блокран – презентаци стенчĕсенчен тата ÿнер экспозицийĕнчен – тăракан курав хатĕрленĕ. Чăваш енĕн социаллă пурнăçĕпе экономика аталанăвĕн 8 çул-йĕрне кăтартнă: ЧР Патшалăх Канашĕн ĕçĕ-хĕлĕ, инвестици вăй-хăвачĕ, промышленноçри, ял хуçалăхĕнчи, сывлăх сыхлавĕнчи, социаллă политикăри, вĕрентÿри, физкультурăпа спортри çитĕнÿсем.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии