09:34 30 октября 2013 г.
Кÿлхĕрринче пурăнакансемшĕн ĕнерхи кун пысăк уяв пулса тăчĕ – кунта районта пĕрремĕш модульлĕ фельдшерпа акушер пункчĕ уçăлчĕ.
ЧР Пуçлăхĕн «Республикăри ял халăхне пĕрремĕшле медицина пулăшăвĕ парассине лайăхлатмалли хушма мерăсем çинчен» указне пурнăçласа хăпартнă илемлĕ те хăтлă çуртра Ираида Туйкина фельдшер ял çыннисене йышăнĕ, 500 ытла çынна пăхса-асăрхаса тăрĕ. Халĕ унăн вырăнтах çынсене пахалăхлă сиплеме, чирсене вăхăтра тупса палăртма сывлăх тĕлĕшпе сĕнÿ-канаш пама пĕтĕм услови аван. Программăпа килĕшÿллĕн районта 2015 çулччен пурĕ çакăн евĕрлĕ çичĕ медицина учрежденийĕ çĕнĕрен тумалла.
Фельдшерпа акушер пунктне уçма хутшăнса ЧР Сывлăх сыхлавĕпе социаллă аталану министрĕ Алла Самойлова ял çыннисене çак паллă кун ячĕпе саламларĕ. «Çĕнĕ сиплев çуртне чи малтанах сирĕн ырлăхшăн, ял çыннисене усă курма туса лартнă. Сирĕн пĕрремĕшле медицина пулăшăвне таçта аякка кайса çÿремесĕр, вырăнтах илме май пултăр тесе пысăк ĕç пурнăçланă. Сывлăхлă пулăр, кунта ача-пăча ытларах çуралса ÿстĕр»,– терĕ Алла Самойлова министр.
Район администрацийĕн пуçлăхĕ Леонид Николаев ялсенче хальхи йышши оборудованипе тивĕçтернĕ модульлĕ фельдшерпа акушер пункчĕсене уçни чăн-чăн парне пулнине палăртрĕ, республика правительствине тата сывлăх сыхлавĕн министерствине ял çыннисен пурнăç шайне лайăхлатассипе тивĕçлĕ ĕçленĕшĕн тав турĕ.
Кÿлхĕрринче пурăнакансен ячĕпе вырăнти медицина пунктĕнче чылай çул вăй хунă Эмма Александровна Софронова сăмах илчĕ. «Унчченхи кивĕ çуртра эпир шăнни те тăтăшах пулнă, кăмакине хутса ăшăтма та вут-шанкине хамăрах кÿрсе килнĕ. Ĕçлеме, паллах, çăмăлах пулман. Халĕ çынсене сиплеме пĕтĕм майсем туса панă ку хăтлă çуртра, килсе кĕме те çав тери кăмăллă. Хамăршăн тăрăшнине шута илсе пирĕн пурин те сывă, усал йăласемсĕр, пурăнма мехел çитермелле», – терĕ медицина ветеранĕ, республика ертÿлĕхне яла кÿнĕ парнешĕн тав туса.
Калининăри шкулта вĕренекенсем уява хаваслăрах ирттерме пулăшрĕç: сăвăсем вуларĕç, ташăпа савăнтарчĕç.
Алла Самойлова министр фельдшерпа акушер пунктĕнчи пациентсене йышăнмалли, тĕрĕслемелли, процедурăсене пурнăçламалли пÿлĕмсене пăхса тухса лайăх хак пачĕ.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии