09:23 30 октября 2013 г.
Шăмат кун Шупашкарта Чăваш наци конгресĕн VIII Аслă пухăвĕ ĕçленĕ
Аслă пухăва Раççейĕн 26 субъектĕнчен тата чикĕ леш енчи пилĕк çĕршывран 282 делегат килнĕ. Авалран килекен йăлапа ЧНК Ваттисен Канашĕн мухтавлă çыннисем Никифор Наумов, Вера Кузьмина, Анатолий Кибеч Аслă пухăва килнисене пил панă. Чăваш наци конгресĕн гимнне – «Асран кайми» юрра – ура çине тăрса юрланă.
Кун йĕркинче çак ыйтусем пулнă: ЧНК президенчĕн Геннадий Архиповăн сăмахĕ тата Николай Угасловăн доклачĕ; ЧНК ревизи комиссийĕн отчечĕ; суйлав ыйтăвĕсем.
ЧР Пуçлăхĕ Михаил Игнатьев хăй тытса пыракан патшалăх политикинчен пĕри наци ăс-хакăлне упраса хăварасси пулнине палăртнă. Çавна май республикăра ку енĕпе мĕнле ĕçсем туса ирттернине каланă. «ЧНК VIII съезчĕ чăваш наци аталанăвне çеç мар, пирĕн халăхăн туслăхне çирĕплетес ĕçе пысăк тÿпе хывса хăварасса шанатăп»,– тенĕ Михаил Игнатьев.
ЧНК президенчĕн Геннадий Архиповăн сăмахĕ кĕске пулнă. Тĕп доклада Николай Угаслов вице-президент хăй çине илнĕ. Геннадий Николаевич вара 15 çул пĕрле ĕçленĕ, чăвашлăхшăн вăйне-халне шеллемен хастарсене тав тунă.
Николай Угаслов çĕнĕ тĕллевсемпе паллаштарнă. Çавсене «ЧНКан чăваш халăхĕн этника хăйне евĕрлĕхне сыхласа хăварас енĕпе ĕçлемелли программăна» кĕртнĕ. Пысăк вăл, социаллă пурнăçпа политикăра, социаллă пурнăçпа экономикăра, ăслăлăхра, вĕрентÿ ĕçĕнче, этнокультурăра пурнăçа кĕртмелли тĕллевсене палăртнă.
Тухса калаçакансем Программа пысăк пĕлтерĕшлĕ, пуласлăхра тĕпе хурса ĕçлемелли тĕллевсем пулнине палăртнă.
Наци вăйĕ – халăх пĕрлĕхĕнче. Вăл çук пулсан, пĕр-пĕрне кĕвĕçетпĕр, кураймастпăр, ура хуратпăр пулсан нимĕнле программа та, тĕллев те пире пулăшас, çăлас çук.
Доклада сÿтсе явма республикăра пурăнакан, тулайран килнĕ делегатсем те хутшăннă.
Аслă пуху делегачĕсем, пĕлтерĕшлĕ мĕн пур сĕнĕве кĕртсе резолюцисем йышăннă.
Юлашки ыйту – ЧНК президентне суйласси. Сасăлава Николай Угасловпа Николай Лукиянов хутшăннă. Нумайрах сасă пухса (168) Николай Угаслов суйланнă.
Çав кунах ЧНК VIII Аслă пухăвĕ çĕнĕрен суйланă Мăн Канаш ЧНК тытăмĕсене çирĕплетнĕ. Президент сĕннипе пĕрремĕш вице-президентпа вице-президентсене суйланă: пĕрремĕшĕ – Валерий Клементьев (юлашки тапхăрта ЧНК президенчĕн тивĕçĕсене пурнăçланă), вице-президентсем – Петр Ивантаев (Ваттисен Канашĕн ертÿçи пулнă), Алексей Леонтьев («Хыпар» издательство çурчĕн директорĕ-тĕп редакторĕ, халĕччен те вице-президент пулнă), Олег Мешков (Чăваш Республикин Патшалăх Канашĕн Председателĕн çумĕ), Константин Яковлев (Тутарстанри чăваш наци культура автономийĕн ертÿçи).
Мăн Канаш президиумĕн çĕнĕ йышне тĕрлĕ сферăра ĕçлекен комитетсен шутне тата йышне çирĕплетме хушса хăварнă. Президиумăн çавăн пекех ЧНК Уставне улшăнусем кĕртмелле. Ăна ЧНКан черетлĕ Аслă пухăвĕнче çитес çул сÿтсе явса йышăнмалла.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии