08:28 21 октября 2013 г.
Юпа уйăхĕн 15-мĕшĕнче Михаил Игнатьев Вăрнар тăрăхĕнче ĕçлĕ çул çÿревре пулчĕ, ĕççипе, «Вăрнарти аш-какай комбиначĕн» ĕçĕ-хĕлĕпе паллашрĕ
М.Игнатьев акционерсен «Вăрнарти аш-какай комбиначĕ» обществине çитсе курчĕ, ял хуçалăхĕнчи çак вăхăтри лару-тăрăва тишкерчĕ. Комбинатра хальлĕхе тĕшĕлĕх кукурузăна вырса çапас ĕç вĕçленмен-ха. Тĕшĕ ытлашши нÿрĕ – типĕтме ансат мар. Сушилка талăкĕпех ĕçре. Кукуруза тухăçĕ пĕлтĕрхинчен икĕ хута яхăн пысăкрах – гектартан 70 центнер тухать. Çĕнĕрен туяннă комбайнсемпе жаткăсем тăкаксене чакарма май параççĕ. Районĕпе кăçал çĕнĕрен сакăр комбайн туяннă. «Техĕмлĕхĕпе кукуруза фуражлăх тырăран чылай хăватлăрах, – палăртнă Республика Пуçлăхĕ, – тĕш тырă кăçал вăтамран 18-шар центнер илтĕмĕр пулсан, кукуруза тĕшшин тухăçĕ темиçе хут пысăкрах пулчĕ. Кукуруза акса туса Вăрнар, Элĕк, Етĕрне районĕсем тĕрĕс тăваççĕ. Выльăх-чĕрлĕх ĕрчетекене кукуруза питĕ кирлĕ».
Çĕр улмине районта 936 гектар лартнă. 830 гектарне алла илнĕ темелле. Кĕр тыррисене 4475 гектар акнă.
Кĕрхи çанталăк çĕр ĕçченне самай канăçсăрлантарчĕ. Анчах уй-хир пурлăхне никам та ана çинче хăварасшăн мар.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии