09:20 07 октября 2013 г.
Иртнĕ ытлари кун Ваттисен кунне паллă турăмăр. Тĕнче шайне çĕкленĕрен, ăна хамăр та уяв вырăннех йышăннă. Пире, авă, Чăваш Республикин пуçлăхĕ те саламланă. Юлашки икĕ çулта çирĕм пĕр пин çынна «Ĕç ветеранĕ» ятпа чыслани çинчен каланă. Аслă ăрусен ĕçченлĕхĕ, культурăпа кăмăл-сипет пуянлăхĕ паянхи çамрăксемшĕн ырă тĕслĕх пулса тăнине палăртнă. Раççей Президенчĕ шăпах культурăна, ăс-хакăла маларах, çÿллĕрех вырăна кăларасшăн. Пуçлăхсем-ертÿçĕсем ватăсемпе тĕл пулнă хушăра ку тĕлĕшрен сахал мар сĕнÿ-канаш илтрĕç пуль. Вăрнарта мана та чĕннĕ хăнара Василий Игнатьевич Романов каланисенче шута илмеллисем чылай. «Культура пайĕ района кирлех», – терĕ ветеран. Калашле, чăнах та ĕнтĕ, халăх хорĕ, халăх театрĕ, ветерансен хорĕ пирки сас-хура тамалчĕ – пур-и вĕсем халь; Катаран килекен кĕрлевпе кăна çырлахсан, хамăрăн пултарулăх сÿнсе лармĕ-и; Патшалăх премийĕн лауреачĕсене çавра юбилейĕсен ячĕпе вăхăтра асăрхаса чыслайманни В.И.Романова та пăшăрхантарнă, кулянтарнă. Кĕçех акă Александр Федорович Доманинăн 90 çулĕ çитет. Герой – ĕç паттăрĕ, вăрçă паттăрĕ. Патшалăхăн чи аслă орденĕпе ăна пилĕк хутчен наградăланă. Ытти хаклă орденĕсем тепĕр пиллĕк. Ятне Чăваш АССР Ĕç мухтавĕпе Паттăрлăхĕн Хисеп Кĕнекине кĕртнĕ. Вун пилĕк çул Кольцовкăри орденлă колхоз председателĕ пулчĕ. Район, республика кĕрекинче чысламалли юлташ. «Районшăн чипер ĕçленисене юлашки çула сăваплăн пĕрлехи йышпа ăсатма пĕлейместпĕр, – терĕ Василий Игнатьевич. – Гурий Ефимович Федоров çинчен ăна пытарнă хыççăн хаçатран тин пĕлтĕм».
Вăрнарта вилме те хăрамалла. Пăтăрмахĕ асаплă. Кун пирки Н.А.Стеклова хытă тарăхса калаçрĕ. Вилене Вăрнарăн – Йĕпреçĕн – Элĕкĕн халтăртаттарса унталла-кунталла хутлама тивет.
Ваттисен Вăрнарти кĕрекине чăн уявла сăпайлăн йĕркелесе ирттернĕшĕн пухăннисем ветерансен районти тата поселокри канашĕсен пуçлăхĕсене А.Ильинпа В.Львова чунтанах тав турĕç, район пурнăçĕпе, ĕçĕ-хĕлĕпе ялан çывăх пулма сăмах татрĕç.
В.МИХАЙЛОВ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии