08:53 07 октября 2013 г.
Вĕренÿ çулĕн вĕçĕ те, пуçламăшĕ те уншăн кашнийĕнчех паллă-палăрăмлă событипе асăнмалăх çырăнать. Кăçалхине хăй кĕтсе тăман çĕртен тус-коллега, иккĕмĕш вăтам шкулăн директорĕ Сергей Петрович Ильин асилтернĕ:
– Маттур, сатур тăванăм! Тепĕр гранта тивĕçнĕ ятпа саламлатăп!
Юрий Александрович Дмитрий Зиминăн «Династия» фончĕн конкурсĕсене хутшăнать. Черетлине, 9-мĕшне, «Современное Естествознание» фонд йĕркелесе ирттернĕ. Унта, яланхиллех, физика, математика, хими, биологи учителĕсем хутшăнаççĕ. Кăçалхи лауреатсен ретĕнче Чăваш енри физиксенчен «Пулас ученăйсен наставникĕ» номинацире «Вĕрентÿри тава тивĕçлĕ ĕçсемшĕн» премие Ю.А.Феофанов тивĕçлĕ пулнă. Лауреата грант Дипломĕпе пĕрле 35 пин тенкĕ преми парса хавхалантарнă.
Грант 100 пин тенкĕлли те пулнă. 2006 çулта Юрий Александрович талантлисен речĕпе картнă учительсен Раççей Федерацийĕнчи конкурсĕнче çĕнтернĕ, Президент премине тивĕçлĕ пулнă. Вĕрентÿре нумай çул хушши инноваци технологийĕсене ĕçе кĕртсе пырать. Смотр-конкурссенче тĕрлĕ номинацире çĕнтернĕшĕн панă дипломĕсем чылай. Инноваци урокĕсен вăл маçтăрланă сценарийĕпе учительсем ăнăçлă усă кураççĕ. «Законы постоянного тока», «Электростатика», «Конструктор школьных сайтов», «Живая физика», «Физика для школьников и абитуриентов», «Открытая физика» темăсене Интернета кĕртнĕ. «Юный физик», «Юный математик» кружоксенче сăнав-тĕпчев тăвасси йăлана кĕнĕ. Ю.Феофановăн физика урокĕсенче компьютерпа усă курассин опычĕпе хамăр районти шкулсенче кăна мар усă кураççĕ.
Ю.Феофанов – учитель-новатор. Аслă категориллĕ учитель. Професси ăсталăхĕн районти конкурсĕнче мала тухса «Çулталăк учителĕ – 2010» ята тивĕçнĕ. Тахçантанпах физиксемпе математиксен районти пĕрлешĕвне ертсе пырать. Методика канашлăвĕсенче, конкурссенче хăй паха тĕслĕхсем кăтартать, çĕнĕлĕхсене коллегăсемпе пĕрле шырама, тупма пĕлет. Унăн уçă урокĕсене Шупашкарта, Çĕмĕрлере, Канашра, Çĕрпÿре, Вăрмар, Элĕк районĕсенче, хамăрăн шкулсенче итленĕ, пысăка хурса хакланă. Аслă классенче вĕренекенсем вĕрентекенĕ тавралла туслăн, çывăххăн, питĕ ăнлануллăн хĕвĕшнине асăрхарăм. Иван Никифорович Никифоровпа çаплаччĕ. Ку шкулта традицисене хытă хисеплеççĕ. Юрий Александрович та пулас чăн математиксемпе уйрăммăн – ÿркенмесĕр, вăхăта, вăй-хала шеллемесĕр тара ÿксе ĕçлет. Воспитанникĕсем Мускаври аслă шкулсене тĕп хуларисемпе така-так тупăшса кĕрееççĕ. Ачасем тус-юлташĕсен – олимпиадăсен призерĕсен ячĕсене хисеплĕн асăнчĕç: Ирина Тикинева, Сергей Ананьев, Григорий Степанов, Олег Чернов, Ксения Алексеева, Степан Прохоров – нумайăн вĕсем, хальхисем те, унчченхисем те.
Пайтах вĕреннĕ вăл. Халь те вĕренет. Ĕçри стажĕ пысăк. Практики пуян. И.Н.Ульянов ячĕллĕ Чăваш патшалăх университетне, педагогикăн Мускаври патшалăх институтне пĕтернĕ. Наукăпа тĕпчев институтĕнче инженер-конструктор пулнă, кăткăс релесем пуçтарнă. Çарти служба хыççăн 1988 – 2008 çулсенче тăван Хирпуç шкулĕнче тăрăшнă. Ĕнтĕ улттăмĕш çул Вăрнарта, хăй кăмăлĕн тĕп тайăнĕпе физикăпа математикăна юратса вĕрентет. Спорт ăмăртăвĕсенче те ачасемпе пĕрле. Теннис секцине ертсе пырать. Ку спортри çĕнтерÿçĕсем Президент кубокне çĕнсе илессишĕн кĕрешнĕ, республикăра 2–3-мĕш вырăнсене тухнă.
Юрий Феофанов – учительсен династийĕнчен. Пĕрлехи педстаж – 300 çул ытлашшипех. Ашшĕн – 42 çул, çав шутран Александр Феофанович 30 çул Хирпуç шкулĕн директорĕ пулчĕ. Амăшĕ, Ираида Павловна, 43 çул шкулта ĕçлесе пенсие тухрĕ. Хаçатсемпе туслă, «Çĕнтерÿ çулне» çырсах тăрать. Юрий йăмăкĕ, Лариса Александровна Харитонова, Хапăсри вăтам шкулта чăваш чĕлхипе литературине вĕрентет. Мăшăрĕ, Валентина Ильинична, Хирпуçĕнче – вырăс чĕлхи учителĕ. Александр Феофановичăн йăмăкĕ, Лидия Феофановна Максимова, математика вĕрентнĕ. Ираида Павловнан йăмăкĕ, Валентина Павловна Сергеева, Çĕрпÿ районĕнче шкул директорĕ пулнă. Çавнашкал çемье çăлтăрĕсен – пĕр тăвансен çăлтăрла ушкăнĕ. Шăп та шай Алтăр Çăлтăр темелле.
М.ВАСИЛЬЕВ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии