10:28 02 октября 2013 г.
Почта çыхăнăвĕн ĕçченĕсем халăхпа ĕçленĕ май кунсеренех çынсен пĕчченлĕхĕпе тĕл пулаççĕ, вĕсен чун ыратăвне кураççĕ. Пĕчченлĕхре хăйсене хăйсем юлнăскерсене пĕр çепĕç те ырă сăмах та чĕрисене ăшăтма çителĕклине, вĕсене тимлĕх кирлине питĕ лайăх ăнланаççĕ.
Ватă çынсен кунĕ тĕлне Раççей Почти «Эсĕ пĕччен мар» Пĕтĕм Раççейри акцие ирттерме йышăннă. Почта çыхăнăвĕн ĕçченĕсем пĕтĕм обществăна ватă çынсен ыйтăвĕсене ытларах тимлĕх уйăрма чĕнсе каланă.
Акцие хутшăнакансем почта уйрăмĕсенче открыткăсем çине салам сăмахĕсем çырса, тĕрлĕ япала е апат-çимĕç пуххисене туянса, хаçат-журнал çырăнтарса хăйсем пачах палламан социаллă учрежденисенче пурăнакан ватă çынсем валли ырă сунса хăварнă.
Ырă чунлă çынсем хамăр районта та акцие хастар хутшăннă. Вĕсем – Шăхальти Олеся Степанова почтальонка, Юрий Вазянов, Лидия Кумрукова, çавăн пекех Вăрнарти М.Габайдуллина, почта çыхăнăвĕн операторĕсем Н.Павлова, Е.Краснова, И.Васильева, Т.Зайцева тата ыттисем. Почта çыхăнăвĕн Вăрнарти тата Калининăри уйрăмĕсенче хăварнă парнесене Вăрнар почтамчĕн пуçлăхĕн коммерци енĕпе тимлекен заместителĕ Нина Захарова Çавалкасри ваттисен çуртĕнче пурăнакансем патне çитернĕ. Ватăсене район хыпарĕсемпе паллашма пулăшас тĕллевпе Нина Александровна хăй ятĕнчен ваттисен çуртне «Çĕнтерÿ çулĕ» хаçата çырăнса панă.
Ватăсем хăйсене хисеп тунăшăн тата манманшăн, уяв умĕн салам сăмахĕсемпе савăнтарнăшăн чунтан тав тунă.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии