10:01 02 октября 2013 г.
Октябрĕн 4-мĕшĕнче гражданла оборона енĕпе Пĕтĕм Раççейри тренировка иртет
Вĕрентÿллĕ пысăк мероприятирен Чăваш Республики те юлмасть. Унта федераллă ĕç тăвакан влаç, вырăнти хăй тытăмлăх органĕсем хутшăнĕç.Тĕп тĕллевĕ – гражданла оборона ертÿçисене чрезвычайлă лару-тăрусене пĕтерес мероприятисенче хăрушсăрлăх пĕлĕвне тата практика хăнăхăвĕсене вĕрентесси тата çирĕплетесси.
Гражданла оборона тренировки пуçланни пирки урамсенче вырнаçтарнă сиренăсемпе громкоговорительсем, çавăн пекех радио тата телевидени каналĕсем пĕлтерĕç. Тревога вĕрентÿллĕ пулĕ, çавна май республика çыннисене лăпкăлăха çухатмалла маррине тата хăйсен ĕçĕпех ĕçлеме ыйтатпăр.
Аса илтерме, «Пурне те пĕлме!» сигнал гражданла оборонăн асăрхаттару сигналĕ. Ăна аварисем, катастрофăсем, çут çанталăк инкекĕсем, тăшман тапăнас хăрушлăх пулсан янратаççĕ.
Сиренăсемпе гудоксем е ытти сигнал кĕрленине илтсен граждансен радиоприемниксене, телевизорсене çутмалла, васкавлă пĕлтерĕве итлемелле. Илтнĕ информацие ертÿçĕне, ĕçтешсене, çемье членĕсене, кÿршĕсене пĕлтермелле.
Пĕтĕм Раççейри гражданла оборона тренировкине октябрĕн 4-мĕшĕнче ирттерни ăнсăртран мар, çак кун Раççейре МЧС гражданла оборона кунне паллă тăваççĕ. Ăна пĕрремĕш хут 1932 çулта шăпах çак кун çирĕплетнĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии