08:59 25 сентября 2013 г.
Пенси фончĕн ĕç-хĕлне çутатас, пенси системинчи çĕнĕлĕхсене халăха пĕлтерес, улшăнусене ăнлантарас ĕçре массăллă информаци хатĕрĕсем – тĕп пулăшуçăсем. Çакна тĕпе хурса Пенси фончĕн республикăри уйрăмĕ вырăнти телевидени-радиопа, хаçат-журналсемпе йĕркеленĕ пĕрлехи ĕçе малашне татах та анлăлатма майсем шырать.
Хамăр районти управленире эрне кун иртнĕ семинар-канашлура та кун йĕркинче ку тĕп ыйту пулнă. Вăрнара Пенси фончĕн Элĕк, Патăрьел, Йĕпреç, Комсомольски, Красноармейски, Пăрачкав, Çĕмĕрле, Шăмăршă, Етĕрне, Елчĕкпе Тăвай районĕсенчи управленийĕсен пуçлăхĕсен заместителĕсем пухăннă.
Семинара Пенси фончĕн республикăри уйрăмĕн пай ертÿçи Елена Ильина уçнă май, пенси çинчен информацие халăхра сарассипе тата ăнлантарассипе кăçалхи 8 уйăхра мĕнле ĕçленине пĕтĕмлетнĕ, малашнехи тĕп тĕллевсене палăртнă.
Канашлу ĕçне Чăваш ен наци телерадиокомпанийĕн «Социаллă ыйту» радиопрограмма редакторĕ Марина Толстова хутшăннă, районсенчи управленисенче массăллă информаци хатĕрĕсемпе çыхăну тытассишĕн яваплă специалистсемпе статья-интервью, тĕрлĕ программа хатĕрлессипе хăйне евĕрлĕ вĕрентÿллĕ мастер-класс ирттернĕ.
Вăрнар тăрăхĕпе ытларах кăсăклантарас тĕллевпе хăнасем валли вырăнти музее экскурси йĕркеленĕ. Музей ертÿçи Е.Шарипова вăрнарсен тĕрлĕ вăхăтри пурнăçне сăнлакан, паллă çыннисем çинчен каласа паракан экспонатсемпе паллаштарнă.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии