08:51 25 сентября 2013 г.
Шупашкарта Чăваш наци библиотекинче «Чăвашсен чаплă çыннисем» серинчи çĕнĕ кĕнекене презентациленĕ. Чăваш Республикин тата Раççей культурăн тава тивĕçлĕ ĕçченĕ, паллă журналист Валентина Иванова вулакан валли «Андриян Николаев: орбиты космические и земные» кĕнеке хатĕрленĕ.
Документаллă повесть темиçе ăрăвăн, тĕрлĕ шăпаллă çынсен аса илĕвĕсен никĕсĕ çинче çырăннă. Каласа кăтартаканĕсем – паллă ученăйсем, конструкторсем, летчик-космонавтсем, Андриян Григорьевич Николаевăн тăванĕсем, тусĕсем.
Космонавт хăй те çак калаçусене хутшăнать, вăл хăйĕн пурнăçĕпе паллаштарать. Вăрçă вăхăтне лекнĕ йывăр ачалăхне, летчик-космонавт мĕнле майпа пулса тăнине, тĕнче уçлăхне тухнине, космонавтсен çĕнĕ ăрăвне хатĕрлес ĕçе хутшăннине аса илет. Автор Андриян Николаевпа (космонавт вĕçевĕпе çыхăннă паллă самантсене çутатнă) тата кĕнекери тĕп сăнарсенчен нумайăшпе хăй курса калаçнă.
«Журналист куçĕпе пăхсан, мана çав историлле кунсенче çав тери ăннă: канăçсăр репортер профессийĕ мана 3-мĕш космонавтпа çыхăннă манăçми пулăмсене хутшăнтарчĕ кăна мар, вĕсен летопиçне çырса пыраканĕ те турĕ», – çырать умсăмахра В.Иванова. Çак çулсенче вăл космонавтăн пурнăçне тĕрлĕ енчен тĕпченĕ, «Первопроходцы космоса» серинчи Андриян Николаев çинчен калакан ĕмĕрхи кĕнеке автор-составителĕ пулса тăнă.
Калининăри вăтам шкулти çамрăк космонавтсен отрядне те çĕнĕ кĕнеке презентацине чĕннĕ. Ачасем унта легендарлă ентешĕмĕре халалланă тематикăллă сăвăсем вуланă. Сăвăсене Андриян Николаева хăй вăхăтĕнче республика тăрăх илсе çÿренĕ ФСБ полковникĕ Валерий Павлович Кошкин журналист çырса панă. Ун хăш-пĕр йĕркисем:
В Шоршелах мы много раз бывали,
Прочитали мы немало книг:
Звездное изданье «тети Вали»
Подарило вновь счастливый миг.
Андрияна очень-очень любим,
Ценим, любим мы свою страну:
И про нас еще напишут люди
Книгу жизни, может, не одну…
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии