08:27 18 сентября 2013 г.
«Советская Чувашия» хаçат парнисемшĕн иртекен çăмăл атлетика эстафетине кăçал пуçласа хутшăнтăмăр, хутăш ушкăнра тăваттăмĕш вырăн йышăнтăмăр. Пирĕншĕн ку япăх мар результат. Эппин, хамăр вăй çине шанма пулать, çитес çулхи чупăва çине тăрса хатĕрленĕпĕр», – пĕлтерчĕ «Гвардеец» спорт обществин ертÿçи Олег Васильев.
Чăн та, пресса спорчĕн фестивалĕ çăмăл атлетсен вăйне тĕрĕслекен чи массăллă чупусенчен пĕри. Кăçалхи 75-мĕш старт авă 1600 ытла чупу тусне пуçтарнă.
Вăрнарсем унта çулсеренех йышлăн хутшăнаççĕ. Кăçалхи юбилейлă ăмăртăва вĕсем «гвардеецсемпе» пĕрле вунă командăпа старта тухнă: ветерансем, район администрацийĕн ĕçченĕсем, Хăмăшри пĕтĕмĕшле пĕлÿ паракан, Калининăри, Аçăмçырминчи, Ярмушкари вăтам шкулсенче, 29-мĕш професси училищинче вĕренекенсем, ял хуçалăх техникумĕн студенчĕсем, яллă район спортсменĕсем.
Яллă районсен ушкăнĕнче Вăрнар район команди кăçал та чи вăйли пулнă. Шучĕпе ку çĕнтерÿ – улттăмĕш. Хальхинче тăван тăрăх чысне Аçăмçырминчи Андрей Николаев, Вăрнарти Сергей Политов, Ершепуçĕнчи Александр Политов тата Диана Политова, Шĕнер Ишекри Мальвина Михайлова тивĕçлĕ хÿтĕленĕ.
Район администрацийĕн, училище тата техникум командисем çиччĕмĕш вырăн йышăннă. Шел те, ветерансен иккĕмĕш результатне командăри пĕр чупуçă 40 çултан çамрăкрах пулнине кура пăрахăçланă. Çапах та вĕсемпе, çĕнтерÿçĕ-командăна миллиçеккунт кăна выляса янăскерсемпе, эпир мухтанма тивĕç. «Çĕнтерĕве çитес çул тавăрăпăр»,– терĕ ку ушкăнра чупнă район администрацийĕн социаллă аталану пайĕн пуçлăхĕн заместителĕ Сергей Политов.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии