10:25 09 сентября 2013 г.
Раççей МЧС-ĕн республикăри Тĕп управленийĕн асăрхав ĕçĕ-хĕлĕн управленийĕн районсенчи уйрăмĕсен пуçлăхĕсем Вăрнарта пĕрлехи семинар-канашлăва пухăннă. МЧС сотрудникĕсем августри ĕç-хĕле пĕтĕмлетсе тишкернĕ.
Йăлана кĕнĕ тăрăх, семинар строй тĕрĕслевĕпе уçăлнă. Ăна Раççей МЧС-ĕн республикăри Тĕп управленийĕн пуçлăхĕн заместителĕ шалти служба полковникĕ Николай Петров ирттернĕ.
Чи малтанах канашлăва хутшăнакансем Туçи Çармăс ялĕнче вырăнти ирĕклĕ пушар командин ĕçĕпе тĕплĕн паллашнă. Асăнса хăвармалла, кунти пушар сÿнтерекенсен ушкăнĕ тăватă çул каялла йĕркеленнĕ, çак тапхăрта çывăхри тата ытти ялсенчи чылай инкекре вут-çулăмпа кĕрешме хутшăннă. Команда маттурĕсем пушара сÿнтерессипе ятарлă вĕрентÿ витĕр тухнă, кунсеренех ылмашăнса талăкĕпех дежурствăра тăраççĕ. Пушар сÿнтерекенсен ирĕклĕ ушкăнĕ унччен колхозăн пушар посчĕ пулнă çуртра вырнаçнă. Пулăшу чĕнмелли телефон номерне вара таврари ялсенче пурăнакансем пурте лайăх пĕлеççĕ.
Туçи Çармăсри тĕл пулу хыççăн канашлун практика пайĕ «Август» Фирма филиалĕн – Вăрнарти хутăш препаратсен завочĕн базинче малалла тăсăлнă.
Николай Петров районти уйрăмсем кăçал пушар хăрушсăрлăхне тивĕçтерессипе, чрезвычайлă лару-тăрусене асăрхаттарассипе, пушарсен сăлтавĕсене уçăмлатас тĕлĕшпе мĕнле тимленине хакланă, малашнехи ĕçри тĕллевсене палăртнă.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии