10:07 09 сентября 2013 г.
Ĕçлĕ визитпа Вăрнар районĕнче халăха ĕçпе тивĕçтерекен патшалăх службин ертÿçи С.П.Димитриев пулнă. Район администрацийĕн пуçлăхĕпе Леонид Николаевпа тĕл пулнă май, районăн социаллă экономика аталанăвне, пурăнмалли çурт-йĕрпе коммуналлă хуçалăх объекчĕсене хутса ăшăтмалли тапхăра хатĕрленине сÿтсе явнă, вырма тата кĕрхи çĕртме ĕçĕсемпе кăсăкланнă.
Хыççăн вĕсем халăха ĕçпе тивĕçтерекен районти центрта канашлу ирттернĕ. Центр директорĕ Римма Евсеева пĕлтернĕ тăрăх, районта ĕçсĕрлĕх шайĕ (0,84%) республикăринчен (0,61%) пысăкрах. Январь – август уйăхĕсенче предприяти-организацисенче 952 ĕç вырăнĕ пушă пулнă. Сентябрĕн 1-мĕшĕ тĕлне – 349.
Сакăр уйăхра центр пулăшнипе 599 çын ĕçлĕ пулнă, вăл шутран 131-шĕ обществăлла ĕçсенче вăй хунă. Çула çитмен 200-е яхăн çамрăка вăхăтлăх ĕç тупса панă. Професси илме 79 çынна янă.
Канашлура çавăн пекех инвалидсене ĕçе вырнаçтарасси, виçĕ çулчченхи ачапа ларакан хĕрарăмсене вĕрентесси, профессилле вĕренÿ заведенийĕсенчен тухакансене ĕç тупса парасси çинчен калаçнă.
С.П.Димитриев ĕç рынокĕнчи лару-тăрăва тишкерсех тăмаллине, предприяти-организаци пуçлăхĕсемпе тачă çыхăну тытмаллине палăртнă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии