09:17 04 сентября 2013 г.
Вăрнар район администрацийĕн пуçлăхĕ йышăннă хушупа килĕшÿллĕн сыснасен африка чумине хирĕçле мероприятисене пурнăçлама ятарлă ĕç ушкăнĕ туса хунă. Унăн халь, малтанах, октябрĕн 1-мĕшĕччен, «Вăрнарти аш-какай комбиначĕ» сысна комплексĕн таврашĕнче пилĕк çухрăмри ялсене çаврăнмалла, килте сысна ĕрчетекен хуçалăхсенче пулмалла, вĕсен хуçисене уведомлени тăратмалла.
Ăнлантару ĕçне халăхра вăраха ямасăр сармалла. Африка чумине район территорине кĕртме юрамасть.
Радиусĕпе 5 километрлă тавралăха 11 ял кĕрет: Мăн Турхан енчисем, Хурăнсур Çармăс, Пăваяль, Санарпуç. Çак ялсенче 111 сысна тытнине палăртнă. Асăннă зонăра сысна вырăнне урăх выльăх-чĕрлĕх усрама сĕннĕ.
САЧ (сыснасен африка чуми) хăрушлăхĕ пирки хаçат урлă темиçе хутчен те асăрхаттартăмăр. Шел те – юлашки çулсенче ку чир анлă сарăлчĕ. Выльăх хăйне епле тытнине сăнасах тăмалла. Сысна малтан вĕриленнипе аптăрать, температура 40,5 – 42 градуса хăпарса вăрахчен чакмасть. Выльăх апатран ютшăнать, ура çине тăрасшăнах мар, тăрсан сулăнкаласа утать, туртăшса сывлать, ÿсĕрет, янахĕ айĕнче е ытти çĕрте юнăхнă вырăнсем палăраççĕ, сăмсинчен юн кайма пултарать т. ыт.те.
Чир сывă выльăха вирус лекнĕ апатран, айсарăмран, пуснă хыççăнхи продуктсенчен çулăхать. Çын, хăй чирлемесен те, вируссене çири тумтирĕпе, транспорт хатĕрĕсемпе сарма пултарать. Санитари нормисене çирĕп пăхăнмалла. Сыснана уйăх çурăран вакцинăсăр ан хăварăр. САЧран сыватма эффективлă меслетсем шыраса тупман-ха. Сысна кĕтĕвне инфекци вучахĕн çирĕм çухрăмри таврашĕнче пусса тăнчах çунтарма тивет.
Чир паллисене сиссенех çывăхри ветеринара евитлемелле. Выльăха картара тытмалла. Хытă вĕрилесе пĕçернĕ апат çеç памалла. Ветеринари докуменчĕсемсĕр суту-илÿпе çыхланас çук.
Çапла-ха çав: хăрушлăх сирĕлмен. Сыхлăха сĕвĕртес марччĕ.
С.БЕЛКОВА,
Хапăсри ветеринари участокĕн заведующийĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии