09:03 04 сентября 2013 г.
Нумайăшĕ пурăнмалли çурт-йĕрпе коммуналлă тивĕçтерÿсемшĕн субсиди пани çинчен илтнĕ. Мĕн çинче никĕсленнĕ-ха ун тытăмĕ; Ăна кашниех илеймест. Субсидие коммуналлă тивĕçтерÿсемшĕн чăннипех те туллин тÿлеймен çынсене параççĕ.
Енчен те сирĕн ăна илме ирĕк пуррине тĕрĕслесе пăхас тесен çемьен пĕр çын пуçне тивекен тупăшне (СД) шутласа тупма çемьери çын шучĕ (N) çине пайламалла та пурăнмалли чи пĕчĕк виçепе (ПМ) танлаштармалла. Енчен те СД ПМ-ран пысăкрах пулсан çак формулăпа С-ССЖКУ – (Дх0,22) шутламалла. Кунта С – субсиди виçи, ССЖКУ – ЖКУ хакĕн стандарчĕ (Чăваш Республикин Министрсен Кабинечĕ 2013 çулхи июлĕн 10-мĕшĕнче çирĕплетнĕ), Д – çемьен пĕрлехи тупăшĕ, 0,22 – çемьен çуртшăн тата коммуналлă тивĕçтерÿсемшĕн тÿленин пулма пултаракан чи пысăк пайĕ.
Енчен те СД ПМ-ран пĕчĕкрех пулсан субсидие тÿрлетÿ коэффициентне (К, СД-на ПМ çине пайласан пулать) шута илсе шутлаççĕ: С-ССЖКУ – (Дх0,22хК).
Пурăнмалли чи пĕчĕк виçен (2013 çулхи 2-мĕш кварталта 6226 тенкĕпе танлашнă) регионти стандарчĕсене улăштарнă май тата социаллă демографин тĕп ушкăнне шута илсе (ĕçлекен çынсемшĕн – 6603 тенкĕ, ачасемшĕн – 6162 тенкĕ, пенсионерсемшĕн – 5167 тенкĕ) субсиди виçине вăхăтра тепĕр хут шутласа параççĕ.
Субсидие патшалăх тата муниципаллă çуртпа усă куракансем, килĕшÿ тăрăх пурăнакансем, çурт-йĕр кооперативĕн членĕсем, харпăрçăсем илме пултараççĕ. Ăна ултă уйăхлăха параççĕ. Ку вăхăт иртсен çынсем ăна тепĕр срока тăсма пултараççĕ. Тĕп услови – субсиди илес текенĕн коммуналлă тивĕçтерÿсемшĕн парăм пулмалла мар. Çавăн пекех документсем тĕрĕс пулмалла. Унăн заявлени, паспорт (хăйĕнне тата çемьери кашни çынăнне, оригинал тата копи), Ф-9 справка, ачисем çуралнине ĕнентерекен свидетельствăсем (оригинал тата копи), парăм çуккине ĕнентерекен квитанцисем, харпăрлăха ĕнентерекен документсем, юлашки ултă уйăхри тупăш çинчен калакан справка, перекет кĕнекин тата ĕç кĕнекин копийĕсене, çăмăллăхсем илме ирĕк пуррине ĕнентерекен документсем тăратмалла.
2013 çулхи августра социаллă хÿтлĕх пайĕ пурăнмалли çуртшăн тата коммуналлă тивĕçтерÿсемшĕн 351 çемьене 531 пин те 553 тенкĕлĕх субсиди уйăрнă. Январьтен пуçласа августăн 15-мĕшĕччен 3 миллион та 152 пин тенкĕлĕх пулăшнă. Пулăшупа ытларах Вăрнар хула, Ярмушка, Çĕрпел, Калинино, Аçăмçырми ял поселенийĕсенче пурăнакансем усă курнă.
Субсиди пирки тĕплĕнрех Чăваш Республикин сывлăх сыхлавĕпе социаллă аталану министерствин сайтĕнче «Социальная поддержка» уйрăмĕнче вуласа е халăха социаллă пулăшу паракан районти пайра (Вăрнар, Илларионов урамĕ, 4-мĕш «а» çурт) ыйтса пĕлме пулать.
И.СМОЛИНА,
пай пуçлăхĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии