08:33 04 сентября 2013 г.
Тунти кунхи черетлĕ планеркăра калаçу хутса ăшăтмалли тапхăра хатĕрленесси пирки пынă май унта «Интех» тулли мар яваплă обществăн ертÿçине Леонид Сантимера чĕннĕ. Управляющи компанийĕ нумай хваттерлĕ 70 çурта пăхса тăрать. Кунсăр пуçне Леонид Сантимер «ТеплоКомфорт» тата «Водоканал» тулли мар яваплă обществăсен пуçĕнче те хăйех тăрать.
Ун сăмахĕсемпе, хĕллехи тапхăра хатĕрленсе чылай ĕç пурнăçланă. 64 çуртра ăшă системисене çуса тасатнă тата прессланă, 67 узела тĕрĕсленĕ. Вăрнарта хваттерсене ултă котельнăйран ăшă пырса тăрать. Вĕсенче халĕ хатĕрленÿ ĕçĕсем пыраççĕ.
Çуртсенчи шыв сечĕсене улăштармалли плана пурнăçланă – 550 метр пăрăхсем хунă. Ăшă сечĕсенче икĕ хут ытларах ĕç тунă, планпа 291 метр улăштарма пăхнă пулсан хальхи вăхăт тĕлне 574 метр çĕнетнĕ. Çывăх вăхăтра Ж.Илюкин урамĕнчи 42-мĕш çуртри путвалта ăшă тăрписене улăштармалла. Çурт тăррисене 1339 тăваткал метр юсанă.
Хальхи вăхăтра поселокра шыв ыйтăвĕ çивĕч. Çулсеренех кĕркунне тĕлне артезиан çăлĕсенче шыв чакать. Кăçал та çаплах. Унти шыв нумай хваттерлĕ 10 çурта парса тăма кăна çитет, ытти çуртсене çиелти шыв пырса тăрать. Вăл вара пахалăхĕпе чылай япăхрах. Хальхи вăхăтра шыв тутине лайăхлатас тĕллевпе ăна тасатассипе хушма мелсем йышăннă. Роспотребнадзор анализĕсен кăтартăвĕсем тăрăх, шыв пахалăхĕ пăтранчăклăх тата тимĕр шайĕн нормисĕр пуçне пĕтĕм норматива тивĕçтерет.
Шалти ĕçсен министерствин «Вурнарский» пайĕн обществăри йĕркене сыхлассипе ĕçлекен уйрăмăн пуçлăхĕн заместителĕ Андрей Сорокин çул çинчи хăрушсăрлăх ыйтăвне хускатнă. Кăçалхи январь–август уйăхĕсенче 27 инкек çырăннă, вĕсенче 33 çын аманнă, улттăн вилнĕ. Инкексен сăлтавĕ – хăвăртлăха ÿстерни, руль умне ÿсĕр ларни, правилăсене уяманни.
Çĕнĕ вĕренÿ çулĕ пуçланнă май, çулсем çинче «Асăрăхăр, ачасем!» профилактика операцийĕ иртет. Кăçал кĕçĕннисем хутшăннипе тăватă çул-йĕр инкекĕ çырăннă, тăватă ача аманнă. Икĕ тĕслĕхĕнче автомобильсем скутерсем çине кĕрсе кайнă.
Вырсарни кун районта Пĕлÿ кунне паллă турĕç. Планеркăра калаçнă май, вĕрентÿпе çамрăксен политикин пайĕн пуçлăхĕ Николай Иванов сахал комплектлă шкулсен ыйтăвне хускатнă. Вĕсен йышĕнче – Кăмашри (30 ача вĕренет), Хирпуçĕнчи тата Чăрăшкас Хирлепри (39-шар ача), Туçи Çармăсри тата Хăмăшри (45–50 ача) шкулсем. Июньте Чăваш енри финанс министерстви районта комплекслă ревизи ирттернĕ. Вăтамран çулталăкра кашни ача пуçне 45 пин тенкĕ тăкакланать. Унта педагогсене, ытти ĕçченсене тÿлесси т. ыт.те кĕрет. Пысăк шкулсенче ку сумма 40 пинпе танлашать. Сахал комплектлисенче вара самай ытларах. Ревизорсем ку укçа-тенкĕпе çын пуçне паракан нормăна пăснине палăртнă. «Сахал комплектлă шкулсем тĕлĕшпе йышăну тумалла», – тенĕ Николай Иванов.
Сентябрĕн 8-мĕшĕнче Вăрнарта пĕр мандатлă 2-мĕш суйлав округĕпе депутатсен районти Пухăвĕн депутатне суйлатпăр. Çавăн пекех Вăрнар тата Калинино поселенийĕсен депутатсен Пухăвĕн депутачĕсен суйлавĕ иртет.
Л.ИВАНОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии