09:20 02 сентября 2013 г.
Калининăри психикăпа неврологи интернатĕнче чирлисене спортпа туслаштарса вăй-хала çирĕплетме пулăшасси – сиплев ĕçĕнче анлăн усă куракан меслетсенчен пĕри. Сывă пурнăç йĕркине тытса пынисĕр пуçне спортпа физкультура кунта сипленекенсене пур енлĕн аталанма хавхалантарать, обществăра хăйсен вырăнне тупма пулăшать.
Чăн-чăн спортсменсем те пур çак йышра. Вĕсем – республикăри сывлăх сыхлавĕпе социаллă аталану министерстви ирттерекен чылай ăмăртăвăн çĕнтерÿçисем тата призерĕсем. Спортăн çуллахи тĕсĕсенче те, хĕллехисенче те пысăк результатсем кăтартаççĕ.
Нумаях пулмасть Калининăри психикăпа неврологи интерначĕн команди спортăн çуллахи тĕсĕсемпе ăмăртса республика фестивалĕнче пĕрремĕш вырăн çĕнсе илнĕ. Сăмах май, куçса çÿрекен кубок калининăсенче – виççĕмĕш хут.
Спорт фестивальне хальхинче Кÿкеçри ача çурчĕ йышăннă, унта республикăри сывлăх сыхлавĕпе социаллă аталану министерстви тытăмне кĕрекен мĕнпур интернат ушкăнĕсем хастар хутшăннă. Виçĕ уйрăм тупăшуран иккĕшĕнче – дартсра тата канат туртассипе – калининăсем малти вырăна тухма пултарнă. Çăмăл атлетика енĕпе эстафетăра команда финиша виççĕмĕш çитнĕ. Çапла майпа пуринчен нумай балл пухса пĕтĕмĕшле ăмăртура Çĕнтерÿ кубокне тивĕçнĕ.
И.ЯКОВЛЕВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии