09:02 02 сентября 2013 г.
Чăваш Республикин Пуçлăхĕ Михаил Игнатьев республикăри чи лайăх вĕрентÿ ĕçченĕсене тата вĕрентÿ учрежденийĕсене палăртакан йышăнăва алă пуснă. Кăтартуллă ĕçлекен 30 педагог тата 20 шкул-пултарулăх центрĕсем йышĕнче вăрнарсем те пур.
Чăваш ен Пуçлăхĕн 20 пин тенкĕлĕх премине поселокри «Ромашка» ача сачĕн аслă воспитателĕ Надежда Васильевна Миронова тивĕçнĕ. Кĕçĕннисене пĕлÿ никĕсне хывас ĕçре вăл 30 çула яхăн тимлет. Пысăк опытлă педагогăн ĕçне маларах вĕрентÿпе çамрăксен политикин пайĕн, Чăваш ен вĕрентÿпе çамрăксен политикин министерствин Хисеп грамотисемпе те хакланă.
Районти чи пысăк шкулсенчен пĕри, инноваци программисене малтисен йышĕпе пурнăçа кĕртсе пыракан Вăрнарти 2-мĕш вăтам шкул та конкурсра палăрнă – 200 пин тенкĕлĕх гранта çĕнсе илме пултарнă.
С.ЧИКМЯКОВА.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии