10:11 28 августа 2013 г.
Республикăри мĕн пур влаç органĕ Ведомствăсем хушшинчи электронлă хутшăну системипе (СМЭВ) ĕçлеме пуçланă. Июльте кăна ку мелпе 14 пин ыйту янă. Ку июньринчен 1,7 хут нумайрах. Май уйăхĕнче Чăваш Республики ку енĕпе Раççей субъекчĕсем хушшинче 74-мĕш вырăнта кăна пулнă пулсан иртнĕ уйăхра 49-мĕш вырăна хăпарнă.
Лару-тăрăва лайăхлатас тĕллевпе Чăваш ен информаци политикин министерстви СМЭВпа ĕçлессипе инструкцисем хатĕрленĕ. Февральте it.cap.ru çĕнĕ портал хута янă. Ку сервиса ятарласа влаç органĕсенче ĕçлекенсем валли йĕркеленĕ. Унта саккун базине справкăллă информацие вырнаçтарнă. Унсăр пуçне унта ыйтусен статистикипе, СМЭВ тĕлĕшпе юлашки çĕнĕлĕхсене пĕлме тата специалистсене ыйтусем пама пулать.
Министерство вырăнти хăй тытăмлăх органĕсен, ял поселенийĕсен, социаллă хÿтлĕх пайĕсен, ĕçпе тивĕçтерекен центрсен ĕçченĕсем валли вĕрентÿллĕ семинарсем ирттерет.
Апла пулин те республикăри пур влаç органĕ те ку системăпа туллин ĕçлемест. Патшалăх служащийĕсем малтанхиллех ыйтусене çырупа е курьер почтипе яраççĕ. Чăваш ен Пуçлăхĕ влаç органĕсене кирлĕ сведенисемпе СМЭВ урлă улшăнма чĕнсе каланă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии