09:41 19 августа 2013 г.
Чăваш ен пенсионерĕсем патшалăх тивĕçтерĕвĕсемпе Интернет урлă усă курма тытăнчĕç. Август пуçламăшĕнче «Бабушки-онлайн» – «Дедушки-онлайн» программăпа курссем вĕçленнĕ. Хальхинче тивĕçлĕ канăва тухнисем патшалăх тивĕçтерĕвĕсен пĕрлехи порталĕпе ĕçлеме вĕреннĕ. Вĕсене ку енĕпе Чăваш ен информаци политикин тата массăллă коммуникацисен министерствин тата Чăваш наци библиотекин ĕçченĕсем пулăшнă.
Халĕ вĕсемшĕн «логин», «пароль», «браузер», «аккаунт», «скайп» тата ытти терминсем çĕнĕлĕх мар. Кашниннех хăйĕн электрон почти, социаллă сетьсенче страница пур.
Кăçалхи çур çулта компьютер пĕлĕвĕн курсĕнче 122 çын пĕлÿ илнĕ. Вăтам ÿсĕм – 62 çул. Вĕренекенсем хушшинче 80-ран иртнисем те пулнă.
«Бабушки-онлайн» – «Дедушки-онлайн» федераллă социаллă программа 2008 çултанпа ĕçлет. Шупашкар ăна алла илнĕ 45-мĕш хула пулса тăнă. Компьютер центрĕ Чăваш наци библиотеки никĕсĕ çинче йĕркеленнĕ. Программăна ятарласа ватă çынсем валли хатĕрленĕ, унта 14 заняти кĕрет. Пенсионерсем тĕрлĕ программăпа ĕçлеме, электронлă çырусем яма, патшалăх тивĕçтерĕвĕсемпе килтен тухмасăр усă курма вĕренеççĕ.
Курссене кăмăл тăвакансем Чăваш наци библиотекинче çырăнма пултараççĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии