12:00 14 августа 2013 г.
Чăваш Республикин саккунĕпе килĕшÿллĕн нумай ачаллă çемьесене çĕр лаптăкĕсем уйăрас ĕç малалла пырать. Район администрацийĕн экономика тата пурлăх хутшăнăвĕсен пайĕн пуçлăхĕ Нина Волкова пĕлтернĕ тăрăх, виçĕ е ытларах ачаллă 158 çемьене учета илнĕ, вĕсенчен 100-шне çĕр лаптăкĕсемпе тивĕçтернĕ. Тĕпрен илсен, вĕсем – поселокра пурăнакансем. 27 участокĕ «Август» Фирмăн «Вăрнарти хутăш препаратсен завочĕ» филиалăн унчченхи хушма хуçалăхĕнчен инçех мар вырнаçнă.
Çĕрсене уйăрнă чухне, паллах, кунта çуртсем çĕкленессе шаннă, çавна валли кунта электричество çути илсе пынă, çăл чавнă. Анчах та стройка пуçлас текенсем тупăнман. Ку çеç те мар, çĕр хуçисем хăйсен лаптăкĕсене çум-курăкран тасатса тăмаççĕ. Çакнашкал ÿкерчĕке «Вурнарымежрайгаз» организацинчен инçех мар уйăрнă çĕр лаптăкĕсенче те курма пулать.
Çавăн пекех çемьесем ку çĕрсене налук тÿлес мар тесе харпăрлăха куçарма васкамаççĕ, ку ĕç укçа-тенкĕ енчен тăкаклă пулнине палăртаççĕ.
Район администрацийĕн пуçлăхĕ Леонид Николаев çĕр лаптăкĕсен хуçисемпе тĕл пулса уйăрнă участоксемпе тĕллевлĕ усă курмалли çинчен ăнлантарма ыйтнă.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии