09:24 05 августа 2013 г.
Пушар сÿнтерекенсем професси енĕпе иртекен ăмăртусенче чи маттуррисене палăртаççĕ. Çакă МЧС тытăмĕн сотрудникĕсене спортпа туслашма, çав вăхăтрах профессилле ăсталăха вĕçĕмех туптаса пыма хавхалантарать.
Палăртма кăмăллă, вăрнарсем республикăра яланах чи çивĕччисен тата хастаррисен йышĕнче.
Июль вĕçĕнче те акă республика финалне тухма тивĕçлисене палăртас тĕллевпе зонăсенчи ăмăртусем иртнĕ. Вăрнарти 27-мĕш пушар чаçĕн маттурĕсем виççĕмĕш ушкăнра Йĕпреçре тупăшнă. Ку зонăра çавăн пекех – Элĕкри, Йĕпреçри, Хĕрлĕ Чутайри, Муркашри, Пăрачкаври тата Етĕрнери пушар чаçĕсен командисем. Кашни командăра çичшер çын – ултă спортсмен тата тренер.
Ăмăртуçăсен тĕрлĕ йывăрлăхсем витĕр тухса вăй виçме тивнĕ. Чи малтанах вĕсем пĕрин хыççăн тепри чăрмавсемлĕ 100 метрлă дистанцие парăнтарнă. Тепĕр тупăшура пушар сÿнтерекенсем штурм пусмипе вĕренÿ башнин 4-мĕш хутне хăвăрт тата тĕрĕс хăпарассипе пысăк ăсталăх кăтартнă. Шыв илсе условнăй пушара сÿнтерес енĕпе те ăмăртусем пысăк кăткăслăхпа уйрăлса тăнă.
Командăсен кăтартăвĕсене пĕтĕмлетнĕ хыççăн судьясен ушкăнĕ пĕрремĕш вырăна Вăрнарти 27-мĕш пушар чаçĕн спортсменĕсем çĕнсе илнине пĕлтернĕ. Иккĕмĕшпе виççĕмĕш вырăнсене Етĕрнери 43-мĕш тата Йĕпреçри 28-мĕш пушар чаçĕн ушкăнĕсем тивĕçнĕ.
Вăрнарсем августăн 9-мĕшĕнче республикăра мала тухассишĕн тупăшĕç.
И.ЯКОВЛЕВА
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии